لاہور: پاکستان میں بھارتی جارحیت کے بعد وزیراعلیٰ مریم نواز شریف نے پورے پنجاب میں ہنگامی حالت کا اعلان کرتے ہوئے پنجاب پولیس سمیت تمام سیکیورٹی اداروں کو ہائی الرٹ کردیا ہے۔

پنجاب کے تمام اسپتالوں کے ڈاکٹروں اور طبی عملے کی چھٹیاں منسوخ کر دی گئی ہین اور تمام اسٹاف کو فوری طور پر ڈیوٹیاں سنبھالنے کا حکم دے دیا ہے۔

پنجاب بھر کے تمام اضلاع کی ڈسٹرکٹ ایڈمنسٹریشن بھی ہائی الرٹ کر دیا گیا اور شہری دفاع سمیت دیگر تمام اداروں کے افسران اور عملہ بھی طلب کر لیا گیا ہے۔

بھارتی بزدلانہ حملے کی مذمت

وزیراعلیٰ پنجاب مریم نواز شریف نے بھارتی بزدلانہ حملے کی شدید مذمت کرتے ہوئے کہا کہ پوری قوم متحد ہوکر دشمن کا مقابلہ کرے گی۔

انہوں نے کہا کہ مئی میں دشمن نے حملہ کیا، 28 مئی 1998 کی طرح منہ توڑ جواب دیں گے، پاکستان کا بچہ بچہ اس امتحان میں سرخرو ہوگا اور اللہ تعالیٰ کے فضل و کرم سے فتح یاب ہوگا۔

 پاک فضائیہ کو خراجِ تحسین

دوسری جانب وزیراعلیٰ مریم نواز شریف نے پاک فضائیہ کو بھارت کے 5 جنگی طیارے مار گرانے پر شاندار الفاظ میں خراجِ تحسین پیش کیا اور کہا کہ بھارت کا غرور، تکبر اور جھوٹا پروپیگنڈہ آج فضاؤں میں جل کر راکھ ہو چکا ہے۔

انہوں نے کہا کہ پاک فضائیہ دنیا پر واضح کر دیا کہ پاکستان امن کا خواہاں ضرور ہے، مگر دفاع پر کوئی سمجھوتہ نہیں کرے گا، یہ صرف دفاع نہیں، پاک فوج نے تاریخ رقم کر دی-

مریم نواز نے مزید کہا کہ پاکستان نے دنیا کو بتا دیا ہے کہ یہ پاکستان ہے اسے آزمانے والے ہمیشہ پچھتاتے ہیں، قوم کو اپنی افواج پر فخر ہے، اپنے جوانوں اور پائلٹس کو سلام پیش کرتے ہیں۔