اسلام آباد: وفاقی وزیر خزانہ محمد اورنگزیب نے کہا ہے کہ ملکی معیشت استحکام کی جانب گامزن ہے، دنیا پاکستان کی معیشت میں بہتری کا اعتراف کر رہی ہے۔

 وزیر خزانہ محمد اورنگزیب نے ایک تقریب سے خطاب کرتے ہوئے کہا ہے کہ معیشت میں میکرو اکنامک استحکام حاصل کر لیا ہے اور عالمی سطح پر اس پیش رفت کو تسلیم کیا جا رہا ہے۔

ان کا کہنا تھا کہ واشنگٹن اور لندن میں سرمایہ کاروں سے ہونے والی ملاقاتوں کے دوران پاکستان کے معاشی استحکام پر مثبت ردعمل دیکھنے کو ملا۔

وزیر خزانہ نے کہا کہ دنیا پاکستان کی معاشی بہتری کی رفتار پر حیران ہے، جو کہ حالیہ اصلاحات اور پالیسی اقدامات کا نتیجہ ہے، حالیہ مہینوں میں پالیسی ریٹ میں نمایاں کمی کے معیشت پر مثبت اثرات مرتب ہوئے ہیں۔

انہوں نے بتایا کہ ایف بی آر میں ڈیجیٹائزیشن کا عمل جاری ہے، جس سے نہ صرف شفافیت میں اضافہ ہوگا بلکہ انسانی مداخلت میں کمی سے ٹیکس نظام کو مزید مؤثر اور شفاف بنایا جا سکے گا۔

محمد اورنگزیب نے کہا کہ حکومت توانائی، ٹیکس نظام اور پنشن سمیت مختلف شعبوں میں طویل المدتی اصلاحات پر کام کر رہی ہے، تاکہ معیشت کو پائیدار بنیادوں پر استوار کیا جا سکے۔

انہوں نے اس بات پر زور دیا کہ تنخواہ دار طبقے پر بوجھ کم کرنے اور ان کے لیے ٹیکس فائلنگ کو آسان بنانے کے لیے عملی اقدامات کیے جا رہے ہیں۔

وزیر خزانہ نے توقع ظاہر کی کہ مستقبل میں قرضوں کی ادائیگی کا بوجھ بھی کم ہو جائے گا، جس سے مالیاتی پالیسی کو مزید گنجائش ملے گی۔

اپنے خطاب میں وزیر خزانہ نے موسمیاتی تبدیلی کو ایک سنگین چیلنج قرار دیا اور کہا کہ اس کے اثرات سے نمٹنے کے لیے حکومت اصلاحاتی اقدامات پر بھی کام کر رہی ہے۔