اسلام آباد: آئندہ مالی سال 2025-26 کے وفاقی بجٹ میں حکومت کی جانب سے زراعت کے فروغ اور چھوٹے کسانوں کے لیے ریلیف اقدامات متوقع ہیں۔

ذرائع کے مطابق وفاقی حکومت نے ملک بھر کے 90 لاکھ چھوٹے کاشتکاروں کے لیے ایک جامع وزیراعظم زرعی ریلیف پیکج تیار کرنے کا فیصلہ کیا ہے۔

ذرائع کا کہنا ہے کہ وزیراعظم شہباز شریف کی ہدایت پر 12 ایکڑ سے کم اراضی رکھنے والے چھوٹے کسانوں کے لیے قرض اسکیم تیار کی گئی ہے، جس کا مقصد ان کی مالی معاونت اور جدید زرعی طریقوں سے روشناس کروانا ہے، تاہم اس اسکیم کے تحت کمرشل بینکوں کے ذریعے کسانوں کو آسان شرائط پر قرض فراہم کیا جائے گا۔

ذرائع کے مطابق بینکوں نے اس منصوبے کے خدوخال تیار کر کے وزیر خزانہ محمد اورنگزیب کو بریفنگ دے دی ہے، جو جلد وزیراعظم کو بھی اس حوالے سے آگاہ کریں گے۔

قرض اسکیم کا پائلٹ پراجیکٹ ستمبر 2025 میں لانچ کیے جانے کا امکان ہے، جس میں ابتدائی طور پر محدود علاقوں کے کسانوں کو شامل کیا جائے گا۔ اسکیم میں نہ صرف مالی معاونت بلکہ جدید زرعی تکنیک اور آگاہی فراہم کرنے کے اقدامات بھی شامل ہوں گے۔

ذرائع نے بتایا کہ حکومت کی جانب سے اس اقدام کو زرعی شعبے میں پائیدار ترقی اور دیہی معیشت کے استحکام کے لیے اہم سنگِ میل قرار دیا جا رہا ہے۔

ذرائع کا مزید کہنا ہے کہ اسکیم کی شرائط آسان رکھی جائیں گی تاکہ زیادہ سے زیادہ چھوٹے کاشتکار اس سے مستفید ہو سکیں۔