اسلام آباد کی عوام کے لیے مویشی منڈیوں سے متعلق اہم خبر سامنے آگئی ہے۔

وفاقی دارالحکومت میں عیدالاضحیٰ کے موقع پر شہری سہولت کے پیش نظر ضلعی انتظامیہ نے 6 مویشی منڈیوں کے قیام کی منظوری دے دی ہے، تاہم جس کا باضابطہ نوٹیفکیشن جاری کر دیا گیا ہے۔

نوٹیفکیشن کے مطابق اسلام آباد میں قائم کی جانے والی مویشی منڈیوں کے لیے فوکل پرسنز بھی تعینات کر دیے گئے ہیں تاکہ منڈیوں کے نظم و نسق، سیکیورٹی اور صفائی کے انتظامات مؤثر طریقے سے انجام دیے جا سکیں۔

نوٹیفکیشن میں بتایا گیا ہے کہ سنگھجانی مویشی منڈی کی نگرانی اسسٹنٹ کمشنر ماحین حسن کے سپرد کی گئی ہے جبکہ سیکٹر I-12 مویشی منڈی کی فوکل پرسن اے سی فروا بتول ہوں گی۔

مویشی منڈی میں جانوروں کی تعداد ایک لاکھ تک پہنچ گئی، قیمتیں آسمان کو چھونے لگیں

اس کے علاوہ سیکٹر I-15 مویشی منڈی کی ذمہ داری اے سی نیہل عبداللہ کو سونپی گئی ہے اور بارہ کہو مویشی منڈی کی فوکل پرسن اے سی عزیر علی خان مقرر کیے گئے ہیں۔

نوٹیفکیشن کے مطابق لہتڑار روڈ پر قائم منڈی کے فوکل پرسن محمد علی ہوں گے جبکہ ایکسپریس ہائی وے پر قائم مویشی منڈی کی نگرانی فہد چیمہ کریں گے۔

ضلعی انتظامیہ نے شہریوں سے گزارش کی ہے کہ وہ صرف مختص کردہ مقامات پر قائم سرکاری منڈیوں سے ہی قربانی کے جانور خریدیں اور غیر قانونی مویشی منڈیوں سے گریز کریں تاکہ شہر میں ٹریفک، صفائی اور دیگر مسائل سے بچا جا سکے۔