راولپنڈی: چیف آف ایئر اسٹاف مارشل ظہیر احمد بابر سدھو نے شہید اسکواڈرن لیڈر عثمان یوسف کے گھر جا کر اُن کے اہل خانہ سے ملاقات کی، فاتحہ خوانی کی اور تعزیت کا اظہار کیا۔

ایئر چیف مارشل ظہیر احمد بابر سدھو نے شہید کی وطن کے لیے دی گئی قربانی کو شاندار الفاظ میں خراج تحسین پیش کرتے ہوئے کہا کہ اسکواڈرن لیڈر عثمان یوسف نے پاکستان ایئر فورس کے ایک آپریشنل ایئربیس پر اپنی ڈیوٹی کے دوران جان کا نذرانہ دے کر قوم کے سر فخر سے بلند کر دیے، شہداء کی قربانیاں ہمیشہ قوم کی یادداشت میں زندہ رہیں گی۔

اس موقع پر ایئر چیف نے شہید کے درجات کی بلندی اور اہل خانہ کے لیے صبر جمیل کی دعا بھی کی۔

بعدازاں ایئر چیف مارشل نے کمبائنڈ ملٹری اسپتال (سی ایم ایچ) راولپنڈی کا دورہ کیا جہاں انہوں نے پاکستان ایئر فورس، پاکستان آرمی کے زخمی اہلکاروں اور شہریوں کی عیادت کی۔

سی ایم ایچ میں چیف آف ایئر اسٹاف مارشل ظہیر احمد بابر سدھو کو زخمیوں کی حالت اور فراہم کی جانے والی طبی سہولیات سے متعلق تفصیلی بریفنگ دی گئی۔

اس دوران سربراہ پاک فضائیہ نے زخمیوں سے فرداً فرداً ملاقات کی اور ان کے حوصلے، عزم اور بہادری کو سراہا۔

انہوں نے اس بات کی ہدایت کی کہ زخمیوں کو بہترین طبی سہولیات اور ہر ممکن انتظامی معاونت فراہم کی جائے۔