ضلع سجاول میں گزشتہ شب گرڈ اسٹیشن میں اچانک آگ بھڑک اُٹھی، جس کے باعث پورے ضلع کی بجلی کی فراہمی مکمل طور پر معطل ہوگئی تھی۔

ابتدائی اطلاعات کے مطابق آگ گرڈ اسٹیشن میں فنی خرابی کے باعث لگی، جس نے اہم مشینری اور ٹرانسفارمرز کو شدید نقصان پہنچایا۔

گرڈ اسٹیشن سے نکلنے والے 6 اہم فیڈر متاثر ہوئے ہیں، جن کے ذریعے چوہڑ جمالی، جاتی، دڑو، بڈھو ٹالپر، بیلو سمیت متعدد شہری و دیہی علاقوں کو بجلی فراہم کی جاتی تھی۔ واقعے کے بعد پورے ضلع میں اندھیرا چھا گیا اور نظام زندگی مفلوج ہو کر رہ گیا ہے۔

حیدرآباد الیکٹرک سپلائی کمپنی (حیسکو) کے ترجمان کے مطابق، حیدرآباد سے ماہرین پر مشتمل ٹیمیں متاثرہ گرڈ اسٹیشن پر پہنچ چکی ہیں اور مرمتی کام تیزی سے جاری ہے۔ نئے ٹرانسفارمرز اور ضروری آلات سجاول پہنچا دیے گئے ہیں۔ تاہم، مکمل بحالی میں کم از کم پانچ روز لگ سکتے ہیں۔

بجلی کی بندش نے شدید گرمی میں شہریوں کی مشکلات میں کئی گنا اضافہ کر دیا ہے۔ اسپتالوں میں مریض گرمی اور بجلی نہ ہونے کی وجہ سے سخت اذیت میں مبتلا ہیں۔ کئی مقامات پر پانی کی فراہمی بھی متاثر ہو چکی ہے، جس سے عوام کو مزید مشکلات کا سامنا ہے۔

ضلع کے دیہی علاقوں میں بجلی کی طویل بندش کے باعث نہ صرف گھریلو زندگی متاثر ہوئی ہے بلکہ زرعی سرگرمیاں بھی رُک گئی ہیں۔ کسان ٹیوب ویل بند ہونے سے فصلوں کو پانی نہیں دے پا رہے، جس سے زرعی معیشت کو بھی خطرات لاحق ہو گئے ہیں۔

ضلعی انتظامیہ نے حیسکو حکام سے مسلسل رابطے میں رہتے ہوئے بحالی کے عمل کو جلد مکمل کرنے کی ہدایات دی ہیں۔ عوام سے اپیل کی گئی ہے کہ وہ افواہوں پر کان نہ دھریں اور صبر و تحمل کا مظاہرہ کریں۔