بھارت نے گزشتہ شب پاکستان کے پانچ مقامات پر بزدلانہ حملے کیے جس کے بعد حکومت نے ایک سال سے زائد عرصے سے بند سوشل میڈیا پلیٹ فارم ایکس کو بحال کر دیا ہے۔

اس موقع پر چیئرمین سینٹ آئی ٹی کمیٹی پلوشہ خان نے کہا کہ ایکس کو کھولنے پر چیئرمین پی ٹی اے کو خراج تحسین پیش کرتی ہوں، بھارت کے ساتھ بیانیہ کی جنگ میں ہمیں بھرپور اور مئوثر جواب دینا ہے۔

پلوشہ خان نے کہا کہ بھارت ہمیشہ رات کے اندھیرے میں کاروائیاں کرتا ہے، اس نے سویلین آبادی کو نشانہ بنایا جس میں بوڑھے، بچے اور خواتین ہیں، بھارت کو ایسا جواب دینا چاہیے کہ وہ ایسی حرکت کرنے سے پہلے دس مرتبہ سوچے۔

یہ بھی پڑھیں: ایکس (ٹوئٹر) صارفین کی بڑی مشکل آسان

 انہوں نے بھارت کے آبے ذخائر کو نشانہ بنانے کا مطالبہ کرتے ہوئے کہا کہ بھارت نے نیلم جہلم کو حدف بنایا ہمیں بھارت کے بھگلیار ڈیم پر چھ میزائل مارنے چاہئے، سندھ طاس معاہدہ معطل ہے بھارت کے ہر ڈیم کو میزالوں سے نشانہ بنایا جائے،  بھارت کے ہر اس ډیم کو تباہ کر دینا چاہیے جس سے پانی رکا ہے، راوی ، جہلم ، چناب ، بیاس اور سندھ میں پانی بہنا چاہیے۔

رافیل طیارے تباہ کرنے پر پلوشہ خان کا پاک فضائیہ کو خراج تحسین کرتے ہوئے کہا کہ ہمیں کوئی شک نہیں تھا کہ یہ پاک فضائیہ کے سامنے ڈھیر ہوجائیں گے۔

واضح رہے کہ پاکستان میں گزشتہ برس 8 فروری کو ہونے والے عام انتخابات کے چند دن بعد ہی ایکس کی سروس بند کردی گئی تھی جسے آج بحال کردیا گیا ہے۔