اسلام آباد: بھارتی پروپیگنڈے کو بےنقاب کرنے کیلئے وفاقی وزیراطلاعات عطاء اللہ تارڑ نے بین الاقوامی ومقامی میڈیا کے ہمراہ لائن آف کنٹرول (ایل او سی) کا دورہ کیا۔

 دورے کا مقصد بھارت کی جانب سے پھیلائے گئے جھوٹے، بےبنیاد پروپیگنڈے کو بےنقاب کرنا تھا، تاہم دورے کے دوران بھارتی پروپیگنڈے کو بےنقاب کرنے کے لیے زمینی حقائق میڈیا کے سامنے پیش کیے گئے۔

میڈیا نمائندوں کو مخصوص مقامات پر لے جایا گیا جنہیں بھارت نے مبینہ دہشت گردی کے ٹھکانے قرار دیا، میڈیا نمائندگان نے زمینی حقائق، مقامی آبادی کی گواہی اور حالات کا خود مشاہدہ کیا۔

اس موقع پر عطاء تارڑ نے گفتگو کرتے ہوئے کہا کہ بھارت کی جانب سےکئی مرتبہ پاکستان پر بےبنیاد الزامات لگائے گئے، ہم نے بین الاقوامی، ملکی میڈیا کے سامنے تمام حقائق رکھ دیے ہیں۔

انہوں نے کہا کہ پاکستان ذمےدار ریاست ہے جو نہ صرف علاقائی بلکہ عالمی امن کے لیے بھی پرعزم ہے، پاکستان دنیا کے کسی بھی حصے میں دہشت گردانہ سرگرمیوں کی مذمت کرتا ہے، ہم نے اپنےعمل سے کئی مرتبہ ثابت کیا ہے کہ ہم امن کے داعی ہیں، اپنی خودمختاری کے دفاع کے لیے ہم ہرحد تک جائیں گے۔

وفاقی وزیر نے مزید کہا کہ عالمی میڈٰیا نے بھارتی پروپیگنڈے کی اصل حقیقت دیکھ لی ہے، پاکستان نے دنیا پر واضح کیا کہ وہ علاقائی امن کے لیے پرعزم ہے، تاہم کسی بھی بھارتی جارحیت کا فوری اور منہ توڑ جواب دیا جائے گا۔