پاکستان نے بھارتی جارحیت، فالس فلیگ آپریشن اور جھوٹے پروپیگنڈے کو بے نقاب کرتے ہوئے ناقابل تردید شواہد پر مبنی ایک جامع ڈوزیئر جاری کر دیا ہے۔

سرکاری ذرائع کے مطابق اس ڈوزیئر میں بھارت کی جانب سے کی گئی جارحیت، پہلگام فالس فلیگ آپریشن، اور اس کے بعد بھارتی میڈیا و سوشل میڈیا کے ذریعے چلائی گئی منظم مہم کا مکمل احاطہ کیا گیا ہے۔

ڈوزیئر میں ” بُنْيَانٌ مَّرْصُوْصٌ” کے دوران پاکستان کی تاریخی دفاعی کامیابی کو تفصیل سے پیش کیا گیا ہے، اس میں سیٹلائٹ تصاویر، ویڈیوز، مستند بین الاقوامی میڈیا رپورٹس، اور دیگر شواہد شامل ہیں جو بھارتی جارحیت اور اس کے ناپاک عزائم کو بے نقاب کرتے ہیں۔

ذرائع کے مطابق پاکستان نے اپنی دفاعی کارروائیوں میں صرف ان بھارتی فوجی اہداف کو نشانہ بنایا جہاں سے نہتے اور معصوم پاکستانی شہریوں، بچوں اور عورتوں پر حملے کیے گئے تھے۔

ڈوزیئر میں ان کارروائیوں کے حوالے سے بھارتی نقصانات کی تفصیلات بھی ناقابل تردید شواہد کے ساتھ شامل کی گئی ہیں۔

مزید پڑھیں: پاک بھارت جنگ کے دوران بھارتی میڈیا نے جھوٹا پروپیگنڈہ پھیلایا، نیویارک ٹائمز

ڈوزیئر کے متن میں واضح کیا گیا ہے کہ پاکستان ایک امن پسند ملک ہے، تاہم اپنی خودمختاری اور سالمیت کے دفاع سے کسی صورت پیچھے نہیں ہٹے گا۔

پہلگام واقعے کے بعد بھارتی میڈیا اور را سے منسلک سوشل میڈیا اکاؤنٹس کی طرف سے پھیلائی گئی فیک نیوز، جھوٹی خبریں اور گمراہ کن بیانیے کے شواہد بھی دستاویزی شکل میں سامنے لائے گئے ہیں۔

بین الاقوامی میڈیا حتیٰ کہ خود بھارتی سیاستدانوں اور عوام نے بھی پہلگام فالس فلیگ اور بھارتی میڈیا کے کردار پر سوالات اٹھائے ہیں، جنہیں بھی ڈوزیئر میں شامل کیا گیا ہے۔

ذرائع کا کہنا ہے کہ پاکستان نے پہلگام واقعے کی شفاف اور غیر جانبدارانہ تحقیقات کے لیے مخلصانہ سفارتی کاوشیں کیں جنہیں بھارت نے نظرانداز کیا۔

سفارتی ماہرین کا کہنا ہے کہ پاکستان نے یہ ڈوزیئر جاری کرکے نہ صرف بھارتی جارحیت کو عالمی سطح پر بے نقاب کیا ہے بلکہ سفارتی محاذ پر بھی ایک بڑی کامیابی حاصل کی ہے۔

ماہرین کے مطابق پاکستان نے سچائی اور حقائق بیان کرتے ہوئے بھارتی جھوٹ اور پراپیگنڈے کو زمین بوس کر دیا ہے۔