ڈی جی آئی ایس پی آر لیفٹیننٹ جنرل احمد شریف چوہدری نے غیر ملکی خبر رساں ادارے کو گفتگو میں کہا کہ اگر جنگ چاہیے تو پھر جنگ ہی سہی لیکن پاکستان نے ہمیشہ امن کو ترجیح دی ہے اور امن ہی ہمارا اصل راستہ ہے۔

ترجمان پاک فوج لیفٹیننٹ جنرل احمد شریف چوہدری نے برطانوی نشریاتی ادارے کو دیے گئے انٹرویو میں واضح کیا ہے کہ پاکستان امن کو ترجیح دیتا ہے لیکن اگر جنگ مسلط کی گئی تو اس کا بھرپور جواب دینے کے لیے ہم ہر وقت تیار ہیں۔

انہوں نے کہا کہ پاکستان اور بھارت دونوں ایٹمی ریاستیں ہیں اور ان کے درمیان جوہری جنگ محض “بے وقوفی” ہوگی۔ ایٹمی تصادم دونوں ممالک کے لیے تباہ کن ہوگا لہٰذا اسے ناقابل تصور اور نامعقول سمجھا جانا چاہیے۔

ڈی جی آئی ایس پی آر کے مطابق بھارت گزشتہ کچھ عرصے سے ایسی فضا بنا رہا ہے جس سے تصادم کی صورت پیدا ہو۔ ہر چند سال بعد بھارت جھوٹا بیانیہ گھڑتا ہے جس کا مقصد اپنی اندرونی سیاست کو سہارا دینا ہوتا ہے۔

یہ بھی پڑھیں: ڈی جی آئی ایس پی آر کا چائنا میڈیا گروپ کو انٹرویو

انہوں نے بھارت کی جانب سے کیے گئے حالیہ الزامات کو مسترد کرتے ہوئے کہا کہ اگر بھارت کے پاس دہشت گردی سے متعلق کوئی ثبوت موجود ہیں تو وہ پیش کرے، پاکستان خود کارروائی کرے گا۔ پاکستان کسی دہشت گرد تنظیم کا حمایتی نہیں اور دہشت گردی سے نفرت کرتا ہے۔

ترجمان پاک فوج نے انکشاف کیا کہ بھارت کی جانب سے جن مقامات کو نشانہ بنانے کا دعویٰ کیا گیا، وہاں صرف مساجد تھیں۔ ان مقامات پر اگلے ہی روز میڈیا کو لے جایا گیا اور بھارت کا جھوٹ بے نقاب ہوا۔

لیفٹیننٹ جنرل احمد شریف نے کہا کہ پاکستان نے ہمیشہ ذمہ داری کا مظاہرہ کیا لیکن اگر بھارت کی طرف سے کوئی مہم جوئی کی گئی تو پاک فوج پوری تیاری کے ساتھ اس کا جواب دے گی۔

انہوں نے دوٹوک الفاظ میں کہا کہ اگر جنگ چاہیے تو پھر جنگ ہی سہی لیکن پاکستان نے ہمیشہ امن کو ترجیح دی ہے اور امن ہی ہمارا اصل راستہ ہے۔