راولپنڈی: ڈی جی آئی ایس پی آر لیفٹیننٹ جنرل احمد شریف نے ترک میڈیا سے گفتگو کرتے ہوئے کہا کہ بھارت الزامات سے باز رہے اور اگر کوئی ثبوت ہیں تو کسی غیر جانبدار ملک کو پیش کرے۔

ڈی جی آئی ایس پی آر لیفٹیننٹ جنرل احمد شریف نے ترک میڈیا سے گفتگو کرتے ہوئے کہا کہ بھارت ہمیشہ دہشت گردی کے واقعات کا الزام پاکستان پر عائد کرکے سیاسی فوائد حاصل کرنے کی کوشش کرتا ہے جو کہ ایک انتہائی غیر ذمہ دارانہ رویہ ہے۔

انہوں نے زور دیا کہ بھارت کی جانب سے بغیر ثبوت الزامات عائد کرنے کا سلسلہ بند ہونا چاہیے۔ پہلگام میں سیاحوں پر حملے کے بعد حکومت پاکستان نے انتہائی ذمہ داری کا مظاہرہ کیا اور آزادانہ و غیر جانبدار تحقیقات کی پیشکش کی لیکن بھارت نے اس پیشکش کو قبول کرنے سے انکار کر دیا۔

انہوں نے انکشاف کیا کہ بھارت نے پاکستان میں 6 مختلف مقامات پر حملے کر کے عام شہریوں کو نشانہ بنایا جن میں مسجد پر بمباری، خواتین اور بچوں کی شہادت جیسے افسوسناک واقعات شامل ہیں۔

ڈی جی آئی ایس پی آر کے مطابق بھارت نے پاکستان پر حملے بغیر کسی قابل اعتبار ثبوت کے کیے جو بین الاقوامی قوانین کی کھلی خلاف ورزی ہے۔ پاکستان ان تمام بے بنیاد الزامات کو مکمل طور پر مسترد کرتا ہے۔

ترجمان پاک فوج نے مطالبہ کیا کہ اگر بھارت کے پاس کوئی ثبوت موجود ہیں تو وہ انہیں کسی غیر جانبدار اور معتبر ملک یا عالمی فورم کے سامنے پیش کرے تاکہ سچ سامنے آسکے۔