اسلام آباد: وفاقی وزیر اطلاعات عطا اللہ تارڑ نے قومی اسمبلی میں اظہار خیال کرتے ہوئے کہا کہ اگر پانی روکا گیا تو پوری قوت کے ساتھ جواب دیا جائے گا اور اگر ہمت ہے تو شوق پورا کرلیں۔

وفاقی وزیر اطلاعات عطا اللہ تارڑ نے کہا کہ ملک کی سالمیت کا معاملہ سیاست سے بالاتر ہے، دشمن مکار، بدنیت اور بیوقوف بھی ہے جو پاکستان کے خلاف سازشوں میں مصروف ہے لیکن ہم نے ہمیشہ دشمن کو دھول چٹائی ہے۔

وفاقی وزیر کا کہنا تھا کہ پہلگام واقعہ بھارت کی سیکیورٹی اور انٹیلی جنس کی ناکامی کا منہ بولتا ثبوت ہے، پہلگام فالس فلیگ پر مودی کا مکروہ چہرہ دنیا کے سامنے بے نقاب ہو چکا ہے۔

انہوں نے بتایا کہ حملے کے 10 منٹ کے اندر ایف آئی آر درج کرلی گئی جب کہ پولیس ایک گھنٹے بعد جائے وقوعہ پر پہنچی۔ اگر دشمن تھوڑا عقل مند ہوتا تو اس ڈرامے کی منصوبہ بندی کچھ بہتر کرتا۔

عطا تارڑ نے کہا بھارت پاکستان میں دہشت گردی میں ملوث ہے، جعفر ایکسپریس حملے کی پہلی فوٹیج بھارت کیسے پہنچی؟ بھارت کے دہشت گردوں سے تعلقات کے ٹھوس ثبوت ہمارے پاس موجود ہیں۔ سکھوں کے قتل عام میں بھی بھارتی حکومت کا ہاتھ ہے۔

ان کا کہنا تھا کہ بھارتی نیوی کا کمانڈر آج بھی ہماری تحویل میں ہے اور پاکستان دہشت گردی کا شکار ملک ہے، بھارت ریاستی دہشت گردی میں ملوث ہے۔ ہم پوری دنیا کے سامنے اپنا مقدمہ پیش کر رہے ہیں اور کشمیری عوام کی اخلاقی اور سفارتی حمایت مرتے دم تک جاری رکھیں گے۔

وفاقی وزیر نے یہ بھی کہا کہ اگر بھارت نے آبی جارحیت کی کوشش کی تو بھرپور قوت کے ساتھ جواب دیا جائے گا۔ اگر ہمت ہے تو شوق پورا کرلیں اور بھارت اگر جارحیت کرے گا تو ایسا جواب ملے گا کہ مائیں بچوں کو کہیں گی کہ “بیٹا پاکستان سے پنگا نہ لینا”۔

انہوں نے مزید بتایا کہ دشمن حملے کی تاک میں بیٹھا ہے لیکن آج گجرات کے قصائی کی تمام پالیسیاں ناکام ہو چکی ہیں۔ بھارت بند گلی میں داخل ہو چکا ہے اور اب سوچ رہا ہے کہ حملہ کرے۔

عطا تارڑ کا کہنا تھا کہ ہم نے 90 ہزار جانوں کا نذرانہ پیش کیا ہے، دشمن کو ہمیشہ منہ توڑ جواب دیا ہے اور اگر بھارت نے حملے کی کوشش کی تو دودھ کا دودھ اور پانی کا پانی ہوجائے گا۔