آپریشن بنیان مرصوص کی کامیابی اور شاندار فتح پر ’’معرکہ حق‘‘  نامی فلم جاری کی گئی ہے، یہ 27 منٹ 51 سیکنڈ پر مشتمل جامع اور ایک معلوماتی دستاویزی فلم ہے جو مستند حقائق پر مبنی ہے۔

اس فلم میں نہ صرف ہندوستان کے پہلگام فالس فلیگ آپریشن کو بے نقاب کیا گیا ہے بلکہ پاکستان کی جرات مندانہ عسکری کارروائی معرکہ حق کی جھلک کو بھی پیش کیاگیا ہے۔

یہ فلم ایک ایسے تاریخی لمحہ پر بنائی گئی ہے جس نے جنوبی ایشیا کے جیو اسٹریٹیجک توازن کو یکسر تبدیل کر دیا۔

یہ بھی پڑھیں: بُنْيَانٌ مَّرْصُوْصٌ آپریشن مکمل، معرکہ حق کا نام دیدیا گیا، آئی ایس پی آر

یہ فلم ناقابلِ تردید شواہد کے ذریعے ثابت کرتی ہے کہ پہلگام کا واقعہ بھارتی بیانیے کی بنیاد پر سچائی کی کسوٹی پر پورا نہیں اترتا، جبکہ اس کے برعکس، پاکستان نے نہ صرف اپنے خلاف گھڑے گئے جعلی دہشت گرد کیمپوں کی حقیقت کو دنیا پر آشکار کیا، بلکہ خود بھارتی عوام نے بھی مودی سرکار کے جھوٹ کو بے نقاب کیا۔

دستاویزی فلم میں 10 مئی کو آپریشن  بنیان مرصوص  کے تحت پاکستان کی جانب سے بھارت کو دیا گیا فیصلہ کن عسکری جواب بھی پیش کیا گیا ہے، ایک ایسا جواب جس نے بھارتی جارحانہ عزائم اور جنگی جنون کو واضح پیغام دیا۔

اس ڈاکومینٹری میں سیاسی اور عسکری قیادت کی بر وقت فیصلہ سازی کو بھی اجاگر کیا گیا ہے۔

دستاویزی فلم میں پاکستانی عوام کی افواج پاکستان کے ساتھ بھرپور حمایت اور بہادری کو بھی خراج تحسین پیش کیا گیا ہے۔