اسلام آباد: وزیراعظم محمد شہباز شریف اور مصر کے صدر عبدالفتاح السیسی کے درمیان ٹیلیفون پر اہم گفتگو ہوئی جس میں دوطرفہ تعلقات، جنوبی ایشیا میں امن و سلامتی، سندھ طاس معاہدہ، اور مشرقِ وسطیٰ کی تازہ صورتحال بشمول غزہ کے بحران پر تفصیلی تبادلہ خیال کیا گیا۔

وزیراعظم شہباز شریف نے مصر کی جانب سے پاکستان اور بھارت کے درمیان کشیدگی کم کرانے میں تعمیری کردار، متوازن بیانات اور فعال سفارت کاری پر تہہ دل سے شکریہ ادا کیا۔

انہوں نے اس موقع پر خطے میں امن کی کوششوں میں مصر کے کردار کو سراہا۔

وزیراعظم نے پاکستان کی خودمختاری اور علاقائی سالمیت کے بہادری سے دفاع پر افواجِ پاکستان کو زبردست خراج تحسین پیش کیا اور اس عزم کا اعادہ کیا کہ پاکستان علاقائی امن کے مفاد میں بھارت کے ساتھ جنگ بندی مفاہمت کو برقرار رکھنے کے لیے پرعزم ہے۔

مزید پڑھیں: وزیراعظم کا مصری صدر کے غزہ بحالی منصوبے کی منظوری کا خیر مقدم

وزیراعظم نے صدر السیسی کی توجہ سندھ طاس معاہدے کی اہمیت کی طرف مبذول کراتے ہوئے واضح کیا کہ اس معاہدے کو التواء میں ڈالنے یا اس کی خلاف ورزی کی کوئی بھی کوشش پاکستان کے لیے “سرخ لکیر” تصور کی جائے گی۔

دونوں رہنماؤں نے مشرق وسطیٰ کی بدلتی صورتحال، بالخصوص غزہ میں انسانی بحران پر گہری تشویش کا اظہار کیا۔

وزیراعظم نے عالمی برادری پر زور دیا کہ وہ غزہ کے عوام کے لیے درکار انسانی امداد کی بلا تعطل اور بروقت فراہمی یقینی بنائے۔ انہوں نے امید ظاہر کی کہ آئندہ ماہ دو ریاستی حل کے حوالے سے اقوام متحدہ کی کانفرنس کے بامعنی اور مثبت نتائج برآمد ہوں گے۔

بات چیت کے دوران وزیراعظم نے پاکستان اور مصر کے درمیان تاریخی برادرانہ تعلقات پر اطمینان کا اظہار کرتے ہوئے دوطرفہ تجارت اور سرمایہ کاری کے فروغ کی ضرورت پر زور دیا۔

صدر عبدالفتاح السیسی نے پاکستان کی جنگ بندی مفاہمت اور خطے میں پائیدار امن کے لیے کوششوں کی تعریف کی اور تمام شعبوں میں مصر کی جانب سے پاکستان کے ساتھ قریبی تعلقات کو مزید مضبوط بنانے کی خواہش کا اعادہ کیا۔

صدر السیسی نے غزہ میں انسانی امداد فراہم کرنے پر پاکستان کا خصوصی شکریہ بھی ادا کیا۔

وزیراعظم شہباز شریف نے صدر السیسی کو پاکستان کے سرکاری دورے کی دعوت دی، جسے مصری صدر نے قبول کر لیا۔