عیدالاضحیٰ کے موقع پر بین الصوبائی اور بین الاضلاعی سفر میں زائد کرایوں کی شکایات کے ازالے کے لیے سندھ حکومت نے اہم اور فوری اقدام اٹھا لیا ہے۔

صوبائی وزیر اطلاعات و ٹرانسپورٹ شرجیل انعام میمن کے اعلان کے مطابق، ٹرانسپورٹ کے تمام متعلقہ افسران کی عید کی تعطیلات منسوخ کر دی گئی ہیں اور انہیں ڈیوٹی پر حاضر رہنے کا حکم جاری کر دیا گیا ہے۔

شرجیل میمن نے کہا کہ عید پر لاکھوں شہری سفر کرتے ہیں، اور ان کی سہولت حکومت کی اولین ترجیح ہے۔ عوام کو کرایوں میں غیرقانونی اضافے سے بچانے کے لیے حکومت نے یہ سخت قدم اٹھایا ہے۔

وزیرِ ٹرانسپورٹ نے واضح کیا کہ اگر فیلڈ افسران کرایوں میں زیادتی کی شکایات پر فوری کارروائی نہ کریں تو عوام براہِ راست ڈپٹی سیکریٹری ٹرانسپورٹ سے رجوع کر سکتے ہیں۔

ہر افسر کو عید کے دوران اپنے علاقے میں موجود رہنے اور شکایات کا فوری نوٹس لینے کی ہدایت جاری کی گئی ہے۔

وزیر ٹرانسپورٹ نے متنبہ کیا کہ عوام کی مجبوری سے فائدہ اٹھانے کی کسی کو اجازت نہیں دی جائے گی۔ جو بھی ٹرانسپورٹر سرکاری نرخنامے سے زیادہ کرایہ وصول کرتا پایا گیا، اس کے خلاف سخت قانونی کارروائی کی جائے گی۔

ہم نے افسران کی تعطیلات اسی لیے منسوخ کی ہیں تاکہ عوام کو کوئی مشکل پیش نہ آئے۔ کوئی بھی شہری اگر اضافی کرایہ ادا کرنے پر مجبور ہو، تو فوری طور پر متعلقہ افسر یا ہمارے شکایتی نظام سے رابطہ کرے۔

سندھ حکومت نے عوام سے اپیل کی ہے کہ وہ سرکاری مقرر کردہ کرایوں کے بارے میں آگاہ رہیں، اور اگر کوئی ٹرانسپورٹر زائد رقم طلب کرے تو فوری اطلاع دیں تاکہ موقع پر کارروائی کی جا سکے۔