آئندہ مالی سال کے بجٹ کی تیاریوں کے سلسلے میں عالمی مالیاتی فنڈ (آئی ایم ایف) کا وفد شیڈول کے مطابق پاکستان نہ پہنچ سکا۔

جس کے بعد حکومت اور آئی ایم ایف کے درمیان ورچوئل مذاکرات پر اتفاق کر لیا گیا ہے۔ ذرائع کے مطابق اب یہ بات چیت آن لائن ہوگی۔

وزارت خزانہ اور ایف بی آر ذرائع کے مطابق آئی ایم ایف وفد کے ساتھ بجٹ سے متعلق ابتدائی مذاکرات کل سے آن لائن شروع ہوں گے، جن میں پاکستان کی معاشی ٹیم بجٹ تجاویز اور تخمینے پیش کرے گی۔

مزید پڑھیں: بھارت کی پاکستان کیخلاف مالیاتی سازش،آئی ایم ایف اور فیٹف سے رجوع کرے گا

ذرائع نے بتایا کہ آئی ایم ایف وفد کی پاکستان آمد آئندہ ہفتے متوقع ہے، جس کے بعد مذاکرات کا دوسرا مرحلہ فزیکل سیشنز کی صورت میں اسلام آباد میں منعقد ہوگا۔

حکومتی ذرائع کے مطابق معاشی ٹیم نے بریفنگ اور مالی خاکے کی تیاری مکمل کر لی ہے، اور آن لائن اجلاسوں میں بجٹ سے متعلق مختلف شعبہ جات پر مفصل بریفنگ دی جائے گی۔

آئی ایم ایف ان مذاکرات میں پاکستان کے محصولات، اخراجات، سبسڈی پالیسی، اور مالیاتی خسارے پر تجاویز کا جائزہ لے گا، جبکہ مستقبل کے معاشی اہداف پر بھی غور کیا جائے گا۔

ذرائع کا کہنا ہے کہ آن لائن مذاکرات کے بعد آئی ایم ایف مشن کی پاکستان آمد سے اسٹاف لیول معاہدے کی راہ ہموار ہونے کی امید ہے، جو آئندہ مالی پروگرام کی بنیاد بن سکتا ہے۔