سوات: اے پی ایس خضدار بس حملے کی مذمت اور قومی یکجہتی کے فروغ کے لیے سیدو میڈیکل کالج سوات میں سینٹر آف ایکسیلنس خیبرپختونخوا کے زیر اہتمام سیمینار اور یکجہتی واک کا انعقاد۔

سینٹر آف ایکسیلنس خیبرپختونخوا کے زیر اہتمام سیدو میڈیکل کالج سوات کے تعاون سے سیمینار اور قومی یکجہتی واک کا انعقاد کیا گیا جس کا مقصد اے پی ایس خضدار کے معصوم طلبہ پر ہونے والے سفاک دہشت گرد حملے کی پرزور مذمت اور قومی اتحاد کا مظاہرہ کرنا تھا۔

اس موقع کا مقصد سماجی ذمہ داری اور انتشار پھیلانے والی قوتوں کے خلاف اجتماعی عزم کا اظہار بھی تھا۔ طلبہ و اساتذہ نے اے پی ایس پشاور سے لے کر خضدار تک پیش آنے والے المیوں پر اظہار خیال کیا اور اس بات پر زور دیا کہ تعلیمی ادارے ایک متحد اور باہمت قوم کی تعمیر میں اہم کردار ادا کرسکتے ہیں۔

اس موقع پر ڈائریکٹر جنرل سینٹر فار کاؤنٹرنگ وائلنٹ ایکسٹریمزم (CVE) نے خطاب کرتے ہوئے انتہا پسند نظریات کے خلاف تعلیم، آگاہی اور نوجوانوں کی شمولیت کے ذریعے مؤثر جدوجہد کے عزم کا اعادہ کیا۔

بعد ازاں منعقدہ یکجہتی واک میں طلبہ نے پلے کارڈز اٹھا رکھے تھے جن پر درج تھا ’’خضدار کے شہید طلبہ کو انصاف دو، خاموشی غداری ہے‘‘، ’’ہم اے پی ایس ہیں، ہم خضدار ہیں، ہم ابھریں گے‘‘، ’’نہ بھولیں گے، نہ معاف کریں گے‘‘۔

یہ نعرے نوجوانوں کے جذبے، شعور اور دہشت گردی، فتنۂ الہندستان اور فتنۂ الخوارج کے خلاف ان کے پختہ عزم کی عکاسی کر رہے تھے۔ سیدو میڈیکل کالج کے طلبہ نے امن، اتحاد اور پاکستان کی سالمیت کے دفاع کے لیے پرعزم رہنے کا عہد کیا۔