ترجمان افواجِ پاکستان لیفٹیننٹ جنرل احمد شریف چوہدری نے عرب نیوز کو دیے گئے خصوصی انٹرویو میں واضح کیا ہے کہ اگر بھارت نے سندھ طاس معاہدے کی خلاف ورزی کرتے ہوئے پاکستان کا پانی روکنے کی کوشش کی تو اس کے سنگین نتائج ہوں گے جنہیں پوری دنیا دیکھے گی۔

ڈی جی آئی ایس پی آر نے خبردار کیا کہ اگر بھارت نے آبی جارحیت کی، تو پاکستان برسوں نہیں، دہائیوں تک اس کا مقابلہ کرے گا۔ پاکستان کی 24 کروڑ آبادی کے پانی کو کوئی روکنے کی جرأت نہیں کر سکتا، ان کا کہنا تھا کہ ایسے اقدامات کرنے والا شخص صرف پاگل ہو سکتا ہے۔

لیفٹیننٹ جنرل احمد شریف چوہدری نے کہا کہ پاک فوج ایک پیشہ ور ادارہ ہے جو سیاسی قیادت کے احکامات پر مکمل عمل درآمد کرتی ہے۔ ہم اپنی ذمہ داریوں پر کاربند ہیں اور حکومت کی پالیسیوں پر سنجیدگی سے عمل کرتے ہیں۔

مزید پڑھیں: بھارتی جھوٹ کا پردہ چاک، پاکستانی ڈوزیئر نے عالمی سطح پر ہلچل مچا دی، ویڈیو جاری

ڈی جی آئی ایس پی آر نے لائن آف کنٹرول پر جنگ بندی سے متعلق کہا کہ اگرچہ دونوں جانب سے رابطے موجود ہیں اور جنگ بندی برقرار رہ سکتی ہے، تاہم اگر خلاف ورزی کی گئی تو پاکستان کا ردعمل فوری اور محدود ہوتا ہے، صرف ان مقامات پر جو خلاف ورزی کے ذمہ دار ہوں۔ انہوں نے واضح کیا کہ افواج پاکستان کبھی عام شہریوں یا سول انفراسٹرکچر کو نشانہ نہیں بناتیں۔

بھارتی فضائیہ کے ساتھ حالیہ کشیدگی پر بات کرتے ہوئے ترجمان نے تصدیق کی کہ پاکستان نے بھارت کے پانچ طیارے مار گرائے، جبکہ وزیراعظم نے 6 طیارے مار گرانے کا اعلان کیا ہے اور میں تصدیق کرتا ہوں کہ چھٹا طیارہ میراج 2000 تھا۔ انہوں نے کہا کہ ہم مزید بھارتی طیارے بھی گرا سکتے تھے، مگر ہم نے تحمل کا مظاہرہ کیا۔

کشمیر سے متعلق سوال پر انہوں نے کہا کہ بھارت کی داخلی مسئلہ قرار دینے کی پالیسی ناکام ہو چکی ہے۔ جب تک بھارت مسئلہ کشمیر پر بامعنی مذاکرات کے لیے تیار نہیں ہوتا، خطے میں کشیدگی اور تصادم کا خطرہ برقرار رہے گا۔