پاکستان کی جانب سے مسجد اقصیٰ سے متعلق اسرائیلی اشتعال انگیز اقدامات اور ایک اسکول کو نشانہ بنانے کی شدید مذمت کی گئی ہے۔

دفتر خارجہ کے ترجمان شفقت علی خان  نے کہا کہ پاکستان قابض اسرائیلی فوج اور غیر قانونی آبادکاروں کی جانب سے مسجد اقصیٰ کے مذہبی، تاریخی اور قانونی تشخص کو مجروح کرنے کی شدید مذمت کرتا ہے، اسرائیلی اقدامات ناقابل قبول ہیں۔

ترجمان دفتر خارجہ نے یہ کہا کہ اسرائیل اقدامات بین الاقوامی قوانین کی صریح خلاف ورزی اور خطے میں پہلے سے ہی کشیدہ صورتحال کو مزید بگاڑ سکتے ہیں ،پاکستان مقدس مقامات کے تقدس اور تاریخی حیثیت کے تحفظ، اور اسرائیل کو مزید اشتعال انگیزیوں سے روکنے کا مطالبہ کرتا ہے۔

یہ بھی پڑھیں: سعودی عرب نے اسرائیلی وزیر کی مسجد اقصیٰ آمد کو اشتعال انگیزی قرار دے دیا

ترجمان نے کا یہ بھی کہنا تھا کہ پاکستان غزہ میں قابض طاقت کی جانب سے فلسطینی شہریوں کو مسلسل نشانہ بنانے کی بھی سخت الفاظ میں مذمت کرتا ہے، اسرائیلی شرمناک حملے میں ایسا اسکول نشانہ بنایا گیا جو بے گھر خاندانوں کو پناہ دے رہا تھا۔

ترجمان  دفتر خارجہ نے مزید کہا کہ اسرائیلی حملے کے بعد دل دہلا دینے والی تصاویر  سامنے آئیں میں جن میں بڑی تعداد جاں بحق ہونے والے بچوں کی ہے، اسکول پر اسرائیلی حملہ عالمی برادری کے لیے ایک لمحۂ فکریہ ہونی چاہیے، یہ حملے فوری طور پر بند ہونے چاہییں اور اسرائیل کو اپنے بھیانک جرائم کا جوابدہ ٹھہرایا جانا چاہیے۔