پاکستان مخالف جھوٹا پروپیگنڈہ پھیلانے پر پی ٹی اے نے بھارت کے متعدد یوٹیوب چینلز اور درجنوں ویب سائٹس بلاک کر دی ہیں۔

پاکستان ٹیلی کمیونی کیشن اتھارٹی (پی ٹی اے) نے بھارت کی جانب سے پھیلائے جانے والے جھوٹے اور پاکستان مخالف پروپیگنڈے کے خلاف سخت کارروائی کرتے ہوئے 16 بھارتی یوٹیوب نیوز چینلز کو بلاک کر دیا ہے۔

اس کے ساتھ ساتھ 31 یوٹیوب ویڈیوز اور 32 ویب سائٹس بھی بند کر دی گئی ہیں۔

پی ٹی اے کے مطابق، یہ فیصلہ قومی سلامتی اور پاکستان کے ڈیجیٹل ماحولیاتی نظام کے تحفظ کے تحت کیا گیا ہے۔

بلاک کیے گئے مواد میں گمراہ کن، من گھڑت اور نقصان دہ بیانیے شامل تھے جن کا مقصد عوامی رائے کو مسخ کرنا اور قومی یکجہتی کو متاثر کرنا تھا۔

مزید پڑھیں: بھارت کا بزدلانہ وار، پاک فضائیہ کی طاقت نے دنیا کو متاثر کردیا

ادارے کا کہنا ہے کہ علاقائی صورتحال کے تناظر میں دشمن قوتوں کی جانب سے جھوٹے بیانیے اور اطلاعاتی حملے ایک منظم کوشش کا حصہ ہیں جن کا بروقت تدارک ناگزیر تھا۔

ادھر پاکستان ایئرپورٹس اتھارٹی (پی اے اے) نے واضح کیا ہے کہ ملک کے تمام ایئرپورٹس مکمل طور پر فعال ہیں اور قومی فضائی حدود شہری ہوابازی کے لیے مکمل طور پر دستیاب اور محفوظ ہے۔

پی اے اے کے مطابق، مقامی و بین الاقوامی کمرشل پروازوں کی پُرامن روانی کو یقینی بنانے کے لیے تمام ضروری اقدامات کیے جا رہے ہیں۔

پی اے اے نے مزید بتایا کہ بھارت کی جانب سے ممکنہ خطرات کے پیش نظر بین الاقوامی شہری ہوابازی تنظیم (ICAO) کو بھی آگاہ کر دیا گیا ہے تاکہ عالمی سطح پر احتیاطی تدابیر اختیار کی جا سکیں۔