کراچی، 22 مئی 2020 — پاکستان انٹرنیشنل ایئرلائن (PIA) کی پرواز پی کے 8303 ایک اندوہناک فضائی حادثے کا شکار ہوئی، جس کے نتیجے میں 99 میں سے 97 مسافر جاں بحق ہو گئے۔

یہ پرواز لاہور سے کراچی کے لیے روانہ ہوئی تھی اور لینڈنگ سے محض چند لمحے قبل کراچی میں ماڈل کالونی کے ایک گنجان آباد علاقے میں گر کر تباہ ہو گئی۔

ابتدائی تحقیقات میں حادثے کی وجوہات میں پائلٹس کی جانب سے ایئر ٹریفک کنٹرول کی ہدایات کو نظرانداز کرنا، لینڈنگ کے مقررہ پروٹوکولز کی خلاف ورزی، اور تکنیکی مسائل کے باوجود نامناسب فیصلہ سازی شامل ہیں۔

پی کے 8303 ایک ایئربس A320 طیارہ تھا جو 15 سال پرانا مگر قابل پرواز تھا اور 2014 سے پی آئی اے کے زیر استعمال تھا۔ حادثے سے محض دو ماہ قبل اس کی معمول کی مینٹیننس مکمل کی گئی تھی، اور کسی بڑی خرابی کی اطلاع نہیں دی گئی تھی۔

پرواز نے لاہور سے دن 1:05 پر روانگی اختیار کی۔ تقریباً 90 منٹ بعد، جب طیارہ کراچی کے جناح انٹرنیشنل ایئرپورٹ پر لینڈنگ کے قریب پہنچا، تو ایئر ٹریفک کنٹرول (ATC) نے پائلٹس کو خبردار کیا کہ وہ مطلوبہ بلندی (3000 فٹ) کے بجائے 7000 فٹ پر پرواز کر رہے ہیں۔ اس تنبیہہ کو نظرانداز کر دیا گیا۔

مزید پڑھیں: پی کے 8303 حادثے میں جانبحق 71 مسافروں کو انشورنس دے دی گئی، پی آئی اے

لینڈنگ کے دوران طیارے کا لینڈنگ گیئر نہیں کھل سکا، اور رفتار زیادہ ہونے کی وجہ سے اسے نیچے لانا ممکن نہ رہا۔ کاک پٹ میں وارننگ سگنلز بجتے رہے، جنہیں پائلٹس نے خاطر میں نہ لاتے ہوئے لینڈنگ کی کوشش جاری رکھی۔

نتیجتاً، طیارے کے انجن رن وے سے ٹکرا گئے، جس سے انجنوں کو شدید نقصان پہنچا۔ اس صورتحال کے باوجود، پائلٹس نے طیارے کو دوبارہ فضا میں بلند کرنے کی کوشش کی، جوکہ انجن فیل ہونے کے باعث مہلک ثابت ہوئی۔

چند لمحوں بعد طیارہ کنٹرول سے باہر ہو کر ماڈل کالونی میں رہائشی مکانات پر گر گیا، جس کے باعث زمین پر بھی متعدد مکانات تباہ اور کئی شہری زخمی ہوئے۔

تحقیقات کے اہم نکات:

پاکستانی ایئرکرافٹ ایکسیڈنٹ انویسٹی گیشن بورڈ (AAIB) اور بین الاقوامی اداروں کی ابتدائی رپورٹ کے مطابق:

پائلٹس نے بار بار ATC کی ہدایات کو نظرانداز کیا۔

لینڈنگ گیئر کی ناکامی کی صورت میں ایئر ٹریفک کنٹرول کو آگاہ نہیں کیا گیا۔

انجنوں کے شدید نقصان کے باوجود دوبارہ پرواز کا فیصلہ کیا گیا، جو کہ ایک فاش غلطی تھی۔

طیارے کی رفتار اور بلندی لینڈنگ کے لیے موزوں نہیں تھی، جس کے باعث گلائیڈڈ ڈھلوان کے اصول پر عمل ممکن نہ رہا۔