اسلام آباد: پاکستان نے امریکی صدر ڈونلڈ ٹرمپ کے حالیہ بیان کا خیرمقدم کیا جس میں انہوں نے جنگ بندی معاہدے کی حمایت کی اور خطے میں کشیدگی کم کرنے کے لیے امریکہ اور دیگر دوست ممالک کے تعمیری کردار کو سراہا ہے۔

دفتر خارجہ کے ترجمان نے اپنے ایک بیان میں کہا کہ جنگ بندی معاہدہ خطے میں کشیدگی کے خاتمے اور استحکام کے لیے ایک اہم قدم ہے اور پاکستان اس معاہدے کو مثبت پیش رفت کے طور پر دیکھتا ہے۔

ترجمان نے کہا کہ پاکستان صدر ٹرمپ کی جانب سے مسئلہ جموں و کشمیر کے حل کے لیے کی جانے والی کوششوں کو قدر کی نگاہ سے دیکھتا ہے، کشمیر ایک دیرینہ مسئلہ ہے جو جنوبی ایشیا اور عالمی امن و سلامتی پر گہرے اثرات مرتب کرتا ہے۔

ترجمان نے اس بات پر زور دیا کہ مسئلہ کشمیر کا کوئی بھی منصفانہ اور پائیدار حل اقوام متحدہ کی متعلقہ قراردادوں کے مطابق ہونا چاہیے اور کشمیری عوام کے بنیادی حقوق، بالخصوص ان کے ناقابلِ تنسیخ حق خودارادیت کو یقینی بنایا جانا چاہیے۔

پاکستان نے اس عزم کا اعادہ کیا کہ وہ خطے میں امن، سلامتی اور خوشحالی کو فروغ دینے میں امریکہ اور عالمی برادری کے ساتھ بھرپور تعاون کے لیے پرعزم ہے۔

ترجمان دفتر خارجہ نے مزید کہا کہ پاکستان امریکہ کے ساتھ اپنی ہمہ جہتی شراکت داری سمیت تجارت، سرمایہ کاری اور اقتصادی تعاون کے شعبوں میں کو مزید مضبوط بنانے کا خواہاں ہے۔