دفتر خارجہ کے ترجمان شفقت علی خان نے کہا کہ  پاکستان کو اپنے جامع ایٹمی سلامتی کے نظام اور کمانڈ اینڈ کنٹرول اسٹرکچر کی مضبوطی پر مکمل اعتماد ہے۔

سابق امریکی مشیر قومی سلامتی جان بولٹن کے بھارتی میڈیا کو دیے گئے بیان پر دفترخارجہ کا ردعمل سامنے آگیا۔

دفتر خارجہ کے ترجمان شفقت علی خان نے کہا کہ ستم ظریفی ہے کہ جان بولٹن کا یہ بیان راج ناتھ سنگھ کے ایک بیان سے متاثر ہو کر آیا، راج ناتھ سنگھ ہندو انتہا پسند تنظیم سے تعلق رکھتے ہیں،  اور بارہا پاکستان کے خلاف جارحانہ بیانات دے چکے ہیں۔

یہ بھی پڑھیں: عسکری قیادت کا پاکستان کی خود مختاری اور علاقائی سلامتی کا ہر قیمت پر تحفظ کرنے کا عزم

ترجمان نے کہا کہ عالمی برادری کو پاکستان کے بجائے اس بات پر زیادہ تشویش ہونی چاہیے کہ بھارت کے ایٹمی ہتھیار ایسے افراد کے کنٹرول میں ہیں، جو پاکستان اور مسلمانوں کے واضح دشمن ہیں۔

ترجمان دفتر خارجہ کا یہ بھی کہنا تھا کہ بھارتی ایٹمی ہتھیاروں کا کنٹرول رکھنے والے افرادخود فریبی پر مبنی خطرناک خیالات رکھتے ہیں، بھارتی سیاسی منظرنامے، میڈیا، اور معاشرے میں بڑھتی انتہا پسندی، ایٹمی سلامتی کے حوالے سے حقیقی خدشات کو جنم دیتی ہے۔

ترجمان نے کہا کہ  خدشات اس وقت مزید سنگین ہو جاتے ہیں جب بھارت میں ایٹمی بلیک مارکیٹ کے تسلسل کو مدِنظر رکھا جائے، ایٹمی بلیک مارکیٹ کا وجود جوہری سلامتی کے نظام کی سنگین خامیوں کو ظاہر کرتا ہیں، حساس جوہری مواد کی چوری اور غیرقانونی اسمگلنگ کے بار بار پیش آنے والے واقعات سے سنگین خامیاں ظاہر ہوتی ہیں۔