ترکیہ کے صدر رجب طیب اردوان نے وزیر اعظم شہباز شریف سے ٹیلیفونک رابطہ کیا جس میں دونوں رہنماؤں نے بھارت کی حالیہ جارحیت کے تناظر میں خطے کی صورتحال پر تفصیلی تبادلہ خیال کیا۔

وزیراعظم شہباز شریف نے بھارت کی جانب سے کیے گئے میزائل حملوں کی شدید الفاظ میں مذمت کرتے ہوئے کہا کہ اس بزدلانہ اقدام نے جنوبی ایشیا کے امن و استحکام کو شدید خطرے میں ڈال دیا ہے۔

وزیراعظم نے اس موقع پر پاکستان کی علاقائی سالمیت اور خودمختاری کے دفاع کے عزم کا بھی اعادہ کیا۔

ترک صدر رجب طیب اردوان نے بھارتی حملوں کے نتیجے میں پاکستانی شہریوں کے جاں بحق ہونے پر دلی افسوس کا اظہار کیا اور شہداء کے اہلِ خانہ سے تعزیت کی۔

صدر اردوان نے پاکستانی عوام کے ساتھ بھرپور یکجہتی کا اعادہ کرتے ہوئے کہا کہ ترکیہ ہمیشہ کی طرح پاکستان کے شانہ بشانہ کھڑا ہے۔

وزیراعظم شہباز شریف نے گفتگو کے دوران نشاندہی کی کہ پاکستان نے پہلگام واقعے پر غیرجانبدار اور شفاف بین الاقوامی تحقیقات کی پیشکش کی تھی، جسے بھارت نے رد کر کے جارحیت اور غیر ذمہ دارانہ رویے کا راستہ اپنایا۔

ترک صدر نے خطے میں کشیدگی کم کرنے کی ضرورت پر زور دیتے ہوئے کہا کہ ترکیہ ایک پرامن حل کے لیے ہر ممکن کردار ادا کرنے کو تیار ہے۔

انہوں نے کہا کہ ترکیہ پاکستان کا دیرینہ اور قابلِ اعتماد دوست ہے، اور ترک قوم پاکستان کے سفارتی اقدامات کی کامیابی کے لیے دعاگو ہے۔

دونوں رہنماؤں نے اس بات پر اتفاق کیا کہ امن، باہمی احترام اور بین الاقوامی قوانین کی پاسداری ہی خطے کے دیرپا استحکام کا راستہ ہے۔