بلوچستان میں بھارتی اسپانسرڈ پراکسیز کی معاونت سے دہشت گرد کارروائیاں ایک بار پھر بے نقاب ہوگئیں۔

معرکہ حق ’’آپریشن بنیان مرصوص‘‘ میں تاریخی شکست کے بعد مودی سرکار بوکھلاہٹ کا شکار  ہوچکی ہے جب کہ بلوچستان میں بھارتی پراکسیز کی سہولت کاری بے نقاب ہوچکی ہے۔

سیکیورٹی ذرائع کے مطابق بلوچستان میں بھارتی اسپانسرڈ پراکسیز کی معاونت سے دہشت گرد کارروائیاں ایک بار پھر بے نقاب ہوگئی ہیں جب کہ بھارتی خفیہ ایجنسیاں پراکسیز کو مالی معاونت فراہم کرتی ہیں۔

سیکیورٹی ذرائع نے بتایا کہ بھارتی اسپانسرڈ پراکسیز نہ صرف حملوں کی منصوبہ بندی کرتی ہیں بلکہ کالعدم تنظیموں کو تربیت اور اسلحہ بھی فراہم کرتی ہیں۔

یہ بھی پڑھیں: خضدار اسکول بس حملے میں زخمی مزید 2 طالبات شہید

سیکیورٹی ذرائع کا کہنا ہے کہ بھارتی اسپانسرڈ پراکسیز کے کالعدم تنظیموں کے علاج معالجے کے ساتھ ساتھ سرکاری روابط بھی قائم ہیں، بھارتی حکومت کے ساتھ ساتھ  بھارتی میڈیا بھی دہشت گردوں کی پشت پناہی میں پیش پیش ہے۔

سیکیورٹی ذرائع کا مزید کہنا ہے کہ پاکستان میں دہشت گردانہ حملوں کی خبر سب سے پہلے بھارتی میڈیا دیتا ہے، دہشت گردانہ حملے کی خبربھارتی ذرائع ابلاغ کے اکاؤنٹس سے جاری ہوتی ہے جسے بھارتی میڈیا پروپیگنڈے کے طور پر استعمال کرتا ہے۔

بعض بھارتی چینلز اور اینکرز تو یہاں تک مشورے دے رہے ہیں کہ کالعدم تنظیموں کے دفاتر دہلی میں کھول دیے جائیں اور انہیں ریاستی سطح پر معاونت فراہم کی جائے تاکہ پاکستان کو غیر مستحکم کیا جا سکے۔

دفاعی ماہرین کا کہنا ہے کہ مودی سرکار اور بھارتی فوج کا جنگی جنون نہ صرف جنوبی ایشیا کے امن کے لیے خطرہ بن چکا ہے بلکہ یہ رویہ انسانی حقوق کی بھی سنگین خلاف ورزی کے مترادف ہے۔

ماہرین نے عالمی برادری سے مطالبہ کیا ہے کہ بھارت کی ریاستی دہشت گردی، پراکسی نیٹ ورکس کی سرپرستی اور خطے میں عدم استحکام پیدا کرنے کی کوششوں کا فوری اور مؤثر نوٹس لیا جائے۔

واضح رہے کہ حالیہ دنوں میں پاکستان نے آپریشن ’’بنیان مرصوص‘‘ کے تحت کئی دہشت گرد نیٹ ورکس کا خاتمہ کیا ہے جس کے بعد بھارت کی جانب سے بوکھلاہٹ میں مزید پراکسی کارروائیاں تیز کردی گئیں ہیں۔