بھارت کے 5 طیارے اور بریگیڈ ہیڈ کوارٹر تباہ

اس سے قبل پاک فوج نے دشمن کو مؤثر اور منہ توڑ جواب دیتے ہوئے بھارت کے 5 جنگی طیارے تباہ کیے، اس کارروائی میں بھارتی انفنٹری بریگیڈ ہیڈکوارٹر اور 6 مہار یونٹ کا بٹالین ہیڈکوارٹر بھی نشانہ بنا کر تباہ کیا گیا۔

ایک بھارتی جنگی طیارہ بھٹنڈا میں جبکہ دوسرا اکھنور کے علاقے میں مار گرایا گیا، پاک فضائیہ نے دشمن کا تیسرا رافیل طیارہ، جو 17 ناٹیکل میل دور ایوانتی پورہ کے جنوب مغرب میں موجود تھا، کامیابی سے نشانہ بنا کر تباہ کیا۔

مزید پڑھیں: بزدلانہ وار کے بعد بھارت کو شکست،5بھارتی طیارے ایک ڈرون اور فوجی بریگیڈ ہیڈکوارٹرتباہ

اس کے علاوہ پاکستان نے کوٹلی لوہاراں کے علاقے میں بھارت کے دو ڈرون بھی مار گرائے، تباہ کیے گئے طیاروں میں تین رافیل، ایک مگ-29 اور ایک SU-30 شامل ہیں۔

بھارتی جنگی طیارے اُس وقت نشانہ بنے جب وہ بھارتی سرزمین استعمال کرتے ہوئے پاکستان پر حملہ آور ہو رہے تھے جبکہ اس دوران پاک فضائیہ کے تمام طیارے مکمل طور پر محفوظ رہے۔

بھارت کی دفاعی حکمتِ عملی پر سوالیہ نشان

رافیل طیارے، جنہیں جدید ترین ٹیکنالوجی سے لیس جنگی مشینری سمجھا جاتا ہے، بھارتی فضائیہ کے زیرِ استعمال ہیں۔ گزشتہ ماہ ہی بھارت نے فرانس سے مزید 26 رافیل ایم جنگی طیاروں کی خریداری کا معاہدہ کیا تھا۔ تاہم حالیہ ناکامی نے ان طیاروں کی کارکردگی اور بھارت کی دفاعی حکمتِ عملی پر سوالیہ نشان لگا دیے ہیں۔

اس واقعے کے بعد بھارت میں سوشل میڈیا اور عسکری حلقوں میں شدید ردعمل سامنے آیا ہے، جہاں کئی تجزیہ نگاروں نے دفاعی حکمتِ عملی پر تنقید کرتے ہوئے اس ناکامی کو سنگین غفلت قرار دیا ہے۔

ادھر اس واقعے کے اثرات عالمی سطح پر بھی دیکھنے میں آ رہے ہیں، کیونکہ رافیل طیارے تیار کرنے والی فرانسیسی کمپنی “ڈیسالٹ ایوی ایشن” کے شیئرز کی قدر میں 1.64 فیصد کمی واقع ہوئی ہے، حالانکہ گزشتہ پانچ روز میں ان کے شیئرز میں 3.4 فیصد اضافہ ریکارڈ کیا گیا تھا۔

بھارت کا بزدلانہ حملہ

واضح رہے کہ گزشتہ روز بھارت نے بزدلانہ کارروائی کرتے ہوئے رات کے اندھیرے میں پاکستان کے 6مقامات بہالپور، کوٹلی، مظفر آباد سمیت دیگر علاقوں میں فضا سے میزائل داغے جس کے نتیجے میں ایک بچی سمیت 8 پاکستانی شہید، خاتون اور مرد سمیت متعدد افراد زخمی ہوئے۔

جواب میں پاک فضائیہ نے رافیل سمیت 5 بھارتی طیارے ایک ڈرون مار گرائے،متعدد فوجی نتصیبات کو نشانہ بنایا جبکہ ایک بریگیڈ ہیڈکوارٹر تباہ کردیا، تاہم صبح ہوتے ہی بھارت نے ایل او سی پر سفید جھنڈا لہرا کر اپنی شکست تسلیم کرلی۔