اسلام آباد: منشیات کے خلاف عالمی دن کے موقع پر صدر مملکت آصف علی زرداری اور وزیراعظم محمد شہباز شریف نے قوم کے نام اپنے الگ الگ پیغامات میں منشیات کے خاتمے کے لیے بھرپور عزم کا اظہار کیا ہے۔

صدر مملکت آصف زرداری نے اپنے پیغام میں کہا ہے کہ منشیات کا خاتمہ حکومت کی اولین ترجیحات میں شامل ہے، منشیات کی ترسیل روکنے کے لیے ایک مربوط حکمت عملی وقت کی اہم ضرورت ہے، نوجوان نسل کو منشیات سے محفوظ رکھنا ہم سب کی قومی ذمے داری ہے۔

صدر آصف زرداری نے انسداد منشیات فورس کے کردار کو سراہتے ہوئے کہا کہ فورس نے منشیات کے خلاف اہم خدمات انجام دی ہیں۔

اس موقع پر صدر نے منشیات کے خلاف مہم میں جان قربان کرنے والے اہلکاروں کو خراج عقیدت بھی پیش کیا۔

انہوں نے مزید کہا کہ منشیات کے نقصانات سے متعلق عوامی شعور اجاگر کرنا ناگزیر ہے جبکہ تعلیم، بحالی، اور قانون نافذ کرنے جیسے اقدامات پر مسلسل توجہ دینا ہوگی، منشیات کے شکار افراد کی بحالی کے لیے سہولیات کی فراہمی بھی حکومت کی ترجیحات میں شامل ہے۔

 صدر نے اس عزم کا اعادہ کیا کہ اداروں اور بحالی مراکز کو مزید مضبوط بنایا جائے گا۔

وزیراعظم شہباز شریف

دوسری جانب وزیراعظم نے اپنے پیغام میں کہا کہ ہر سال 26 جون کو منشیات کے خلاف عالمی دن منایا جاتا ہے تاکہ اس لعنت کی روک تھام کے لیے عالمی عزم کو دہرایا جا سکے، یہ دن نئی نسلوں کو منشیات کے مہلک اثرات سے بچانے کی اہمیت کو اجاگر کرتا ہے۔

انہوں نے کہا کہ منشیات کا مسئلہ ایک عالمی چیلنج ہے اور حکومت پاکستان اس سے مکمل طور پر آگاہ ہے، بین الاقوامی تعاون کے بغیر اس لعنت کا مؤثر انداز میں خاتمہ ممکن نہیں، حکومت انسداد منشیات فورس کے ذریعے اس مسئلے سے نمٹنے کے لیے سرگرم عمل ہے، انفرادی اور کمیونٹی سطح پر اجتماعی عزم اور شراکت ضروری ہے۔

شہباز شریف نے اس بات پر زور دیا کہ منشیات اور اس کی آسان دستیابی انسانی معاشرے میں شدید تکالیف کا سبب بنتی ہے اور نوجوانوں کو منشیات کے نقصانات اور اس سے منسلک نیٹ ورکس سے آگاہ کرنا وقت کی ضرورت ہے۔

وزیراعظم نے منشیات کے متاثرین کے علاج اور بحالی کے لیے ایک مربوط اور مشترکہ حکمت عملی اپنانے پر زور دیا۔