اسلام آباد: دفتر خارجہ نے بھارتی قیادت اور وزارت خارجہ کے حالیہ اشتعال انگیز بیانات پر سخت ردعمل دیتے ہوئے انہیں نہایت تشویشناک اور غیر ذمہ دارانہ قرار دیا ہے۔

 ترجمان دفتر خارجہ کے مطابق بھارتی رہنماؤں کی جانب سے خصوصاً بہار میں دیے گئے بیانات دشمنی پر مبنی ذہنیت کے عکاس ہیں، جو خطے میں امن کی بجائے کشیدگی کو ہوا دینے کا واضح ثبوت ہیں۔

ترجمان نے کہا کہ بھارت کی جانب سے پاکستان کو خطے میں عدم استحکام کا ذمہ دار ٹھہرانے کی کوششیں نہ صرف بے بنیاد بلکہ حقیقت سے مکمل طور پر دور ہیں۔ حقائق کو کھوکھلی کہانیوں یا توجہ ہٹانے کی چالوں سے چھپایا نہیں جا سکتا۔

بیان میں کہا گیا کہ بین الاقوامی برادری بھارت کے جارحانہ رویے اور پاکستان میں دہشت گرد سرگرمیوں کی مبینہ حمایت سے بخوبی آگاہ ہے۔

ترجمان دفتر خارجہ نے واضح کیا کہ جموں و کشمیر کا تنازع بدستور جنوبی ایشیا میں امن و استحکام کے لیے ایک بنیادی خطرہ ہے اور اس مسئلے کو نظرانداز کرنا خطے کو بداعتمادی اور ممکنہ تصادم کی طرف دھکیلنے کے مترادف ہوگا۔

ترجمان نے کہا کہ پاکستان اس دیرینہ تنازعے کے منصفانہ اور پائیدار حل کے لیے پُرعزم ہے اور ایسا حل اقوام متحدہ کی قراردادوں اور کشمیری عوام کی امنگوں کے مطابق ہی ممکن ہے۔

دفتر خارجہ نے بھارت کو واضح پیغام دیتے ہوئے کہا کہ دھمکیوں، غلط بیانی اور طاقت کے استعمال کے ذریعے بھارت اپنے مقاصد حاصل نہیں کر سکتا، حالیہ پیش رفت نے ثابت کیا ہے کہ جنگجویانہ رویہ اور دباؤ کی پالیسی قطعی طور پر بے سود ہے۔

ترجمان نے مزید کہا کہ پاکستان نہ صرف امن اور تعمیری مذاکرات کے لیے تیار ہے بلکہ اپنی خودمختاری اور علاقائی سالمیت کے تحفظ کے لیے بھی مکمل طور پر مستعد ہے۔

انہوں نے زور دیا کہ پائیدار امن کے لیے بالغ نظری، ضبط و تحمل اور بنیادی مسائل کے حل کی جانب سنجیدہ اقدامات کی ضرورت ہے۔