اسلام آباد: عالمی بینک نے دنیا بھر میں غربت ناپنے کا طریقہ کار تبدیل کردیا ہے جب کہ پاکستان کی 44.7 فیصد آبادی غربت کا شکار ہے۔

عالمی بینک نے دنیا بھر میں غربت ناپنے کا طریقہ کار تبدیل کرتے ہوئے آمدنی کی نئی حد مقرر کردی ہے جس کے تحت پاکستان جیسے نچلے درمیانے آمدنی والے ممالک (لوئر مڈل انکم ممالک) میں روزانہ کی آمدن 4.20 ڈالر سے کم ہونے کو غربت کی علامت قرار دیا گیا ہے۔

نئے پیمانے کے مطابق پاکستان کی44.7 فیصد آبادی غربت کا شکار ہے جو تقریباً 10 کروڑ 79 لاکھ 50 ہزار افراد پر مشتمل ہے۔ اس سے پہلے پرانے معیار (3.65 ڈالر یومیہ) کے مطابق پاکستان میں غربت کی شرح 39.8  فیصد تھی۔

عالمی بینک کے مطابق انتہائی غربت جانچنے کے لیے یومیہ آمدنی کی حد 3 ڈالر فی کس مقرر کی گئی ہے جس کے تحت پاکستان کی 16.5 فیصد آبادی جو کہ تقریباً 3 کروڑ 98 لاکھ افراد بنتی ہے، وہ انتہائی غربت کی کیٹیگری میں آتے ہیں۔

عالمی بینک کا کہنا ہے کہ پیمانہ بدلنے سے لوگوں کے معیار زندگی پر کوئی اثر نہیں پڑے گا بلکہ صرف غربت کی عالمی سطح پر شناخت اور تقابلی تجزیے کے طریقے کو بہتر بنایا گیا ہے۔

نئے معیار کے تحت پاکستان میں 1200 روپے سے کم یومیہ آمدنی رکھنے والے افراد غربت کی تعریف میں آئیں گے۔ تاہم رپورٹ کے مطابق پاکستان میں یہ اعداد و شمار2018-19 کے پرانے ڈیٹا کی بنیاد پر مرتب کیے گئے ہیں کیونکہ حکومت نے نئی مردم شماری کے مکمل نتائج عالمی بینک کو فراہم نہیں کیے۔

کم آمدنی والے ممالک کے لیے غربت کی حد2.15 ڈالر سے بڑھا کر 3 ڈالر کردی گئی ہے۔ اپر مڈل انکم ممالک کے لیے اب غربت کی حد6.85 ڈالر کے بجائے 8.30  ڈالر یومیہ مقرر کی گئی ہے۔

اگر پاکستان کے لیے یہی بلند ترین معیار اپنایا جائے تو88.4 فیصد آبادی اس سطح سے نیچے زندگی گزار رہی ہے۔

عالمی بینک نے اپنی رپورٹ میں تصدیق کی ہے کہ پاکستان اب بھی نچلے درمیانے آمدنی والے ممالک کی فہرست میں شامل ہے اور اسی حیثیت سے غربت کا نیا پیمانہ اس پر لاگو ہوگا۔