انٹرنیشنل فائنانس کارپوریشن (آئی ایف سی) نے پاکستان کے ریکوڈک منصوبے کے لیے 400 ملین ڈالر کی مالی معاونت فراہم کی ہے جس کے بعد آئی ایف سی کی کل سرمایہ کاری 700 ملین ڈالر تک پہنچ گئی۔

ریکوڈک منصوبہ ملکی معیشت میں نئی روح پھونکنے کو تیار ہے جبکہ یہ پاکستان کی ترقی کی جانب ایک اور مضبوط قدم ثابت ہوگا۔

بین الاقوامی مالیاتی اداروں کی جانب سے پاکستان پر اعتماد کیا جا رہا ہے جس کے سبب ریکوڈک منصوبے میں بھاری سرمایہ کاری جاری ہے۔

 ریکوڈک منصوبے کی لاگت 6.6 بلین ڈالر ہے، جس کے لیے مالیاتی اتحاد قرض و سرمایہ سے فنڈ فراہم کرے گا، ریکوڈک منصوبے  سے 37 سال میں 74 ارب ڈالر تک آمدن کی توقع ہے۔

ریکوڈک منصوبے میں یو ایس ایگزِم، ایشیائی ترقیاتی بینک، کینیڈا اور جاپان کے مالیاتی اداروں کی شمولیت بھی متوقع ہے۔

یہ بھی پڑھیں: ریکوڈک: ایک غیر منصفانہ معاہدہ

آئی ایف سی کے سربراہ مختار ڈیوپ کا کہنا ہے کہ’’پاکستان میں انفرااسٹرکچر، توانائی اور قدرتی وسائل پر توجہ بڑھا رہی ہے۔‘‘ پاکستان میں توانائی و قدرتی وسائل میں دوگنا سرمایہ کاری کریں گے۔

پاکستان کا سب سے بڑا تانبے اور سونے کا منصوبہ ریکوڈک، 2028 میں پیداوار شروع کرے گا۔ جس سے بلوچستان کی ترقی اور روزگار کے وسیع مواقع پیدا ہوں گے۔

ریکوڈک منصوبے سے پاکستان میں غیرملکی سرمایہ کاری کو فروغ ملے گا اور پاکستان کو عالمی معدنیاتی نقشے پر لانے میں اہم کردار ادا کرے گا۔