شہر قائد کے مختلف علاقوں میں آج بھی وقفے وقفے سے بارش کا سلسلہ جاری ہے۔

محکمہ موسمیات کے مطابق کراچی میں بارش کا سلسلہ اتوار تک جاری رہے گا، اس دوران تیز ہواؤں کے ساتھ شدید گرج چمک بھی متوقع ہے۔

شہر قائد میں آج درجہ حرارت 32 ڈگری سینٹی گریڈ تک رہنے کا مکان ہے، جبکہ کم سے کم درجہ حرارت 27.5  ڈگری سینٹی گریڈ ریکارڈ کیا گیا، اس کے علاوہ ہوا میں نمی کا تناسب 78 فیصد ہے۔

کراچی میں اس وقت سمندری ہوائیں مکمل طور پر معطل ہیں، شہر میں 10 کلو میٹر فی گھنٹہ کی رفتار سے مغربی ہوا چل رہی ہے، جبکہ بارش کی شدت میں شام میں تیزی آنے کا امکان ہے۔

محکمہ موسمیات نے شہر کے نشیبی علاقوں میں اربن فلڈنگ کی پیشگوئی کی ہے جبکہ کمزور ساخت عمارتیں، بل بورڈ، بجلی کے پولز سے شہریوں کو دور رہنے کی ہدایت بھی کی گئی ہے۔

یہ بھی پڑھیں: کراچی میں سب سے زیادہ بارش کہاں ہوئی؟

محکمہ موسمیات کے مطابق کراچی میں گزشتہ چوبیس گھنٹوں میں سب سے زیادہ بارش سرجانی ٹاؤن میں 16 ملی میٹر ریکارڈ کی گئی، اس کے علاوہ سعدی ٹاون میں 10.2، نارتھ کراچی میں 7.1، گلشن معمار میں  5.4، صدر اور بیس مسرور میں 5 ملی میٹر ریکارڈ کی گئی۔

اسی طرح جناح ٹرمینل میں 2.6، اورنگی ٹاؤن میں 2.5، کیماڑی میں 2.5، اولڈ ایئر پورٹ میں 2.2 ملی میٹر ریکارڈ کی گئی ہے۔

یونیورسٹی روڈ میں 2،  گلشن حدید میں 2، ناظم آباد میں 1.4، ڈی ایچ اے میں 2 اور 1 اور شاہراہ فیصل میں 1 ملی میٹر بارش ریکارڈ کی گئی ہے۔