اسلام آباد: وزیراعظم پاکستان شہباز شریف نے کہا ہے کہ روایتی جنگ کی طرح آبی معاملے پر بھی بھارتی گھمنڈ خاک میں ملائیں گے۔

وزیراعظم شہباز شریف نے آج آبی ذخائر اور پانی کی صورتحال پر ایک اعلیٰ سطحی اجلاس کی صدارت کی، جس میں پانی کے مسئلے کو ملک کی بقا سے جوڑتے ہوئے اسے اجلاس کا “اہم ترین ایجنڈا” قرار دیا گیا۔

اپنے خطاب میں وزیراعظم نے بھارت کی جانب سے پانی بند کرنے کی دھمکیوں کو سختی سے مسترد کرتے ہوئے کہا کہ جیسے روایتی جنگ میں بھارت کو شکست دی، اسی طرح آبی معاملات میں بھی اُس کا غرور خاک میں ملا دیں گے۔

وزیراعظم کا کہنا تھا کہ بھارت کی دھمکیاں کم ہونے کے بجائے مزید بڑھ رہی ہیں لیکن خوش آئند بات یہ ہے کہ دنیا نے بھارت کے ان یکطرفہ اقدامات کو قبول نہیں کیا۔

انہوں نے واضح کیا کہ بھارت سندھ طاس معاہدے کو ایک ہتھیار کے طور پر استعمال کرنے کی کوشش کر رہا ہے، خاص طور پر حالیہ جنگ میں شکست کے بعد وہ پاکستان پر دباؤ بڑھانا چاہتا ہے۔

شہباز شریف نے خبردار کیا کہ اگر آبی وسائل کے تحفظ اور ان میں اضافے کے لیے ابھی سے سنجیدہ اقدامات نہ کیے گئے تو آئندہ نسلیں ہمیں معاف نہیں کریں گی۔

انہوں نے زور دیا کہ ہمیں اپنے آبی ذخائر خود بڑھانا ہوں گے اور بھارت کی ممکنہ آبی جارحیت کا مقابلہ کرنے کے لیے خود کو ہر سطح پر تیار رکھنا ہوگا۔

وزیراعظم نے یاد دلایا کہ 24 اپریل کو ہونے والے قومی سلامتی کمیٹی کے اجلاس میں بھی بھارت کی آبی چالوں کا بھرپور جواب دینے کا فیصلہ کیا گیا تھا۔

انہوں نے کہا کہ بھارت سندھ طاس معاہدے کی مسلسل خلاف ورزی کر رہا ہے اور دنیا کے سامنے اپنے بیانیے کو غلط انداز میں پیش کر رہا ہے۔

آخر میں وزیراعظم نے اس بات پر زور دیا کہ پاکستان کسی بھی قیمت پر اپنے پانی کے حقوق کا دفاع کرے گا اور اس حوالے سے قومی یکجہتی اور عملی اقدامات کی ضرورت ہے۔