اسلام آباد: وزیراعظم محمد شہباز شریف نے بجلی کے بلوں میں پی ٹی وی کی فیس ختم کرنے کا اعلان کردیا ہے۔

وزیراعظم شہباز شریف نے پاور اسمارٹ موبائل ایپ ’اپنا میٹر اپنی ریڈنگ‘ منصوبے کا باضابطہ افتتاح کردیا ہے، جسے بجلی کے شعبے میں ادارہ جاتی اصلاحات کی جانب ایک اہم پیش رفت قرار دیا جا رہا ہے۔

اس موقع پر وزیراعظم نے منصوبے کو صارفین کے حقوق کے تحفظ، بجلی چوری کی روک تھام اور شفافیت کے فروغ کی جانب ایک مثبت قدم قرار دیا۔

تقریب سے خطاب کرتے ہوئے وزیراعظم نے کہا کہ میٹر ریڈنگ سے متعلق ماضی میں صارفین کی طرف سے متعدد شکایات موصول ہو رہی تھیں، جنہیں مدنظر رکھتے ہوئے اس منصوبے کا آغاز کیا گیا۔

انہوں نے کہا کہ اس اقدام سے ٹیکنالوجی کے استعمال کو فروغ ملے گا اور بجلی کے بلوں میں درستگی ممکن بنائی جا سکے گی۔

وزیراعظم نے بجلی کے نرخوں میں کمی کو حکومت کی اولین ترجیح قرار دیتے ہوئے کہا کہ آئی پی پیز کے ساتھ کامیاب مذاکرات اور عالمی منڈی میں تیل کی قیمتوں میں کمی کا فائدہ بھی عوام تک منتقل کیا گیا ہے۔

شہباز شریف نے توانائی کے شعبے میں شمسی توانائی کے فروغ کو سراہتے ہوئے کہا کہ اس سے بجلی کی مجموعی کھپت میں کمی آئی ہے، جو کہ قابل اطمینان ہے۔

اس دوران وزیراعظم نے اعلان کیا کہ بجلی کے بلوں میں پی ٹی وی فیس کو ختم کیا جا رہا ہے، تاکہ صارفین پر غیر ضروری مالی بوجھ کم کیا جا سکے۔

شہباز شریف نے وزیر توانائی اور ان کی ٹیم کی کاوشوں کو سراہتے ہوئے کہا کہ اصلاحات کے اس عمل کو مزید تیز کیا جائے گا تاکہ پائیدار ترقی کی راہ میں حائل رکاوٹوں کو دور کیا جا سکے۔

انہوں نے مزید کہا کہ صارفین کو موبائل ایپ اور میٹر ریڈنگ سے متعلق سہولتوں اور ان کے فوائد سے آگاہی دینے کے لیے مہم بھی شروع کی جائے گی۔