اسلام آباد: وزیراعظم محمد شہباز شریف نے کہا ہے کہ ایران اسرائیل جنگ بندی خوش آئند ہے، پاکستان نے بھرپور، مستقل انداز میں ایران کی حمایت کی۔

وزیراعظم شہباز شریف نے وفاقی کابینہ کے اجلاس سے خطاب کرتے ہوئے ایران اور اسرائیل کے درمیان جنگ بندی کو ایک خوش آئند پیش رفت اور پاکستان کے کردار کو مؤثر اور مستقل قرار دیتے ہوئے کہا کہ ہم نے ہر سطح پر ایران کی حمایت کی۔

انہوں نے بتایا کہ جب اسرائیل نے حملہ کیا تو سعودی عرب نے اس کی کھل کر مذمت کی جبکہ قطر پر حملے کے بعد پاکستان نے فوری طور پر ایک سخت مذمتی بیان جاری کیا۔

وزیراعظم نے کہا کہ ایران نے نہ صرف پاکستان کی سیاسی اور عسکری قیادت کا شکریہ ادا کیا بلکہ پاکستانی عوام، صدر آصف علی زرداری، فیلڈ مارشل جنرل عاصم منیر اور خود ان کے کردار کو بھی سراہا۔

انکا کہنا تھا کہ اگر یہ جنگ جاری رہتی تو اس کے نتائج نہایت خطرناک اور تباہ کن ہو سکتے تھے لیکن پاکستان سمیت دیگر علاقائی قوتوں کی کوششوں سے کشیدگی میں کمی آئی اور فریقین جنگ بندی پر آمادہ ہوئے، جس میں پاکستان کا کردار کلیدی رہا۔

بجٹ کے حوالے سے گفتگو کرتے ہوئے وزیراعظم نے وزیر خزانہ اور اسحاق ڈار سمیت تمام اتحادی جماعتوں کی کوششوں کو سراہتے ہوئے کہا کہ جٹ پر بہت محنت کی گئی ہے، جس کے لیے میں وزیر خزانہ اور پوری ٹیم کا شکریہ ادا کرتا ہوں۔

وزیراعظم نے پاک فوج کے کردار پر بھی روشنی ڈالی اور کہا کہ پاک فوج فتنۂ خوارج کو کاری ضرب لگا رہی ہے، دشمن کو شکست فاش دے چکی ہے اور عظیم قربانیاں دے رہی ہے۔