اسلام آباد: وزیراعظم محمد شہباز شریف نے خاندانی ترسیلات زر کے عالمی دن کے موقع پر اپنے پیغام میں بیرون ملک مقیم پاکستانیوں کو زبردست خراج تحسین پیش کیا ہے۔

وزیراعظم شہباز شریف نے اپنے پیغام میں کہا کہ آج ہم دنیا بھر کے ساتھ مل کر خاندانی ترسیلات زر کا عالمی دن منا رہے ہیں، یہ دن ہمارے اُن لاکھوں پاکستانیوں کے اعتراف کا دن ہے جو اپنی محنت کی کمائی اپنے خاندانوں کو بھیج کر نہ صرف ان کی زندگی سنوارتے ہیں بلکہ پاکستان کی معیشت کو بھی مستحکم کرتے ہیں۔

انہوں نے کہا کہ تقریباً 90 لاکھ سے زائد پاکستانی خلیجی ممالک، یورپ، شمالی امریکا اور دیگر خطوں میں مقیم ہیں، ان کی طرف سے بھیجی جانے والی ترسیلات زر محبت، وفاداری اور ذمہ داری کا عملی اظہار ہیں۔

وزیراعظم نے بتایا کہ رواں مالی سال کے دوران بیرون ملک پاکستانیوں نے ریکارڈ 34.9 ارب ڈالر وطن بھیجے، جو گزشتہ سال کے مقابلے میں 28.8 فیصد زائد ہیں، صرف مئی 2025 میں 3.7 ارب ڈالر موصول ہوئے، جو گزشتہ برس مئی کے مقابلے میں 13.7 فیصد اضافہ ہے۔

انکا کہنا تھا کہ ان ترسیلات زر نے نہ صرف زرمبادلہ کے ذخائر کو تقویت دی بلکہ ملک کی معاشی ترقی میں بھی نمایاں کردار ادا کیا ہے، یہ مثبت اشاریے ہمارے تارکین وطن کی وطن سے محبت، محنت اور حکومت کی معاشی پالیسیوں پر اعتماد کا منہ بولتا ثبوت ہیں۔

انہوں نے کہا کہ حکومت غیرملکی سرمایہ کاری اور برآمدات کو بڑھا کر اقتصادی استحکام کے لیے پرعزم ہے۔

اپنے پیغام کے آخر میں وزیراعظم نے مزید کہا کہ آئیے، آج کے دن ہم بیرون ملک مقیم پاکستانیوں اور ترقیاتی شراکت داروں کے ساتھ مل کر کام کرنے کے عہد کی تجدید کریں تاکہ ہم مل کر پاکستان کو خوشحال اور مضبوط بنا سکیں۔