کراچی: شہر قائد کے مختلف علاقوں میں گزشتہ شام سے لے کر آج صبح تک مجموعی طور پر چار بار زلزلے کے جھٹکے محسوس کیے گئے، جس کی وجہ سے شہریوں میں شدید خوف و ہراس پھیل گیا۔

زلزلہ پیما مرکز کے مطابق تازہ ترین جھٹکے صبح 10 بج کر 29 منٹ پر ریکارڈ کیے گئے جن کی شدت ریکٹر اسکیل پر 3.2 تھی جبکہ زلزلے کا مرکز قائدآباد کے قریب اور اس کی گہرائی تقریباً 10 کلومیٹر زیر زمین تھی۔

متاثرہ علاقوں میں لانڈھی، ملیر، شاہ فیصل کالونی، کورنگی، مجید کالونی، شیرپاؤ کالونی اور گڈاپ ٹاؤن شامل ہیں، جہاں رہائشیوں نے واضح جھٹکوں کو محسوس کیا۔

عینی شاہدین کے مطابق جھٹکے اس قدر شدید تھے کہ لوگ خوف کے مارے گھروں سے باہر نکل آئے۔

گزشتہ رات بھی 1 بج کر 12 منٹ پر پہلا جھٹکا محسوس کیا گیا تھا، جس کے بعد 1:30 تک مزید دو جھٹکے ریکارڈ کیے گئے، ان جھٹکوں سے قبل شام 5 بجے بھی شہر کے مختلف علاقوں میں زلزلے کی لرزہ خیز کیفیت دیکھی گئی۔

اہلِ علاقہ نے بتایا کہ جھٹکوں کے فوراً بعد مختلف علاقوں کی مساجد سے اذانیں دی گئیں اور شہریوں نے کثرت سے “اللہ اکبر” اور “استغفار” کے ورد شروع کر دیے۔

کئی مقامات پر گھروں کی دیواروں میں دراڑیں پڑنے کی اطلاعات بھی موصول ہوئی ہیں، جبکہ پرندوں کی غیر معمولی پرواز اور شور نے فضا کو مزید خوفزدہ کر دیا۔

زلزلے کے پے در پے جھٹکوں کے بعد شہریوں کی بڑی تعداد اب بھی کھلے میدانوں یا گلیوں میں موجود ہے اور گھروں میں واپس جانے سے گریز کر رہی ہے۔

شہر میں زلزلے سے تاحال کسی جانی یا مالی نقصان کی اطلاع موصول نہیں ہوئی، تاہم حکام نے شہریوں سے اپیل کی ہے کہ وہ افواہوں سے گریز کریں اور کسی بھی ایمرجنسی کی صورت میں فوری طور پر ہیلپ لائنز سے رابطہ کریں۔