اسلام آباد: بانی پی ٹی آئی کی سابقہ اہلیہ ریحام خان کے نئی سیاسی جماعت کے اعلان کے بعد ہی پارٹی کا لوگو تنازعہ کا شکار ہوگیا جس پر سوشل میڈیا پر بحث جاری ہے۔

سابق وزیر اعظم اور بانی پی ٹی آئی کی سابقہ اہلیہ ریحام خان نے آج اپنی نئی سیاسی جماعت کا باقاعدہ اعلان کردیا ہے۔

ریحام خان نے اپنی سیاسی جماعت کا نہ صرف اعلان کیا ہے بلکہ پارٹی کا نام، منشور اور لوگو بھی جاری کیا ہے جب کہ پارٹی کا نام ’’پاکستان ری پبلک پارٹی‘‘ رکھا ہے۔

یہ بھی پڑھیں: کیا ریحام خان کی ’تیسری‘ شادی بھی ناکام ہوچکی ہے؟

معروف صحافی عبدالجبار ناصر نے سوشل میڈیا پر تنقید کرتے ہوئے لکھا ’’غالباً مونوگرام بنانے میں بہت زیادہ جلدی تھی یا کسی نے کاپی پیسٹ کردیا‘‘۔

ان کا کہنا تھا ’’امریکن ڈیپارٹمنٹ آف ہوم لینڈ سیکیورٹی یعنی امریکی محکمہ برائے داخلی سلامتی اور پاکستان ری پبلک پارٹی کا مونوگرام ایک ہی جیسا ہے، یعنی نقل تو کی مگر عقل نے بھی کام چھوڑ دیا‘‘۔

ڈیجیٹل کریٹر عاصم خان لکھتے ہیں ’’امریکی ہوم سیکورٹی محکمے کا مونوگرام اور آج شام 5 بجے کراچی میں پیدا ہونے والی پاکستان ری پبلک پارٹی کا لوگو جس کی سربراہ معروف ہوسٹ، سابق خاتون اول، مصنفہ اور ماڈل ریحام خان صاحبہ ہیں‘‘۔

انہوں نے کہا ’’پارٹی کے باقی عہدے تاحال خالی ہیں، کوئی کام ڈھنگ سے نہیں کرسکتے۔ کم از کم کسی اچھے گرافک ڈیزائنر سے پارٹی لوگو ہی ڈھنگ کا بنوالیتے‘‘۔