صدر مملکت آصف علی زرداری اور وزیراعظم شہباز شریف نے بلوچستان میں مسافروں کے سفاکانہ قتل کی شدید الفاظ میں مذمت کی ہے۔

صدر مملکت آصف علی زرداری

’’فتنۃ الہندُوستان پاکستان میں انتشار اور بد امنی پھیلانا چاہتا ہے‘‘

صدر مملکت آصف علی زرداری نے بلوچستان میں مسافروں کے سفاکانہ قتل کی شدید الفاظ میں مذمت کرتے ہوئے کہا کہ دہشتگردوں نے بس سے اتار کر معصوم شہریوں کو بے دردی سے قتل کیا، یہ بربریت فتنۃ الہندُوستان کی پاکستان میں خونریزی کی گھناؤنی سازش ہے۔

صدر آصف زرداری نے کہا کہ فتنۃ الہندُوستان پاکستان میں انتشار اور بد امنی پھیلانا چاہتا ہے، ہم اپنی سرزمین کو فتنۃ الہندُوستان اور اس کے سہولت کاروں سے ہر صورت پاک کریں گے۔

یہ بھی پڑھیں: بلوچستان میں دہشتگردوں کی بزدلانہ کارروائی، پنجاب جانے والی بسوں سے اتار کر 9 مسافر شہید کردیے

صدر مملکت نے مزید کہا کہ دہشتگردی کے مکمل خاتمے تک ہماری جدوجہد جاری رہے گی، ہم لواحقین کے غم میں برابر کے شریک ہیں اوران کے اہل خانہ سے دلی ہمدردی اور تعزیت کا اظہار کرتے ہیں۔

وزیر اعظم شہباز شریف

’’دہشتگردوں سے پوری قوت سے نمٹیں گے‘‘

وزیراعظم شہباز شریف نے بلوچستان کے علاقے سر ڈاکئی میں بس سے مسافروں کے اغوا اور  ہلاکت کی شدید مذمت کرتے ہوئے کہا کہ دہشتگردوں سے پوری قوت سے نمٹیں گے۔

وزیراعظم نے کہا کہ بے گناہ افراد کے خون کا بدلہ لیا جائے گا، نہتے شہریوں کا قتل فتنتہ الہندوستان کی کھلی دہشتگردی ہے۔

شہباز شریف  نے مزید کہا کہ عزم، اتحاد اور طاقت سے دہشت گردی کے ناسور سے نمٹیں اور اس کو جڑ سے اکھاڑ کر دم لیں گے۔