اسلام آباد: ملک میں صحت کی سہولیات کی قیمتوں میں اضافہ جاری ہے، جس سے خاص طور پر کم آمدنی والے افراد کے لیے علاج کروانا اور بھی زیادہ مشکل ہو گیا ہے۔

ادارہ شماریات کی تازہ ترین رپورٹ کے مطابق جون کے مہینے میں صحت کی سہولیات کی قیمتوں میں 0.99 فیصد اضافہ ہوا ہے جبکہ سالانہ بنیادوں پر یہ اضافہ 12.63 فیصد تک پہنچ چکا ہے۔

رپورٹ میں ادویات کی قیمتوں میں جون میں 0.63 فیصد اور سالانہ 15.30 فیصد اضافہ درج کیا گیا ہے۔

اس کے علاوہ ڈاکٹروں کی کلینک فیس میں جون کے دوران 1.32 فیصد اضافہ ہوا جبکہ سالانہ طور پر یہ فیسیں 12.80 فیصد مہنگی ہو گئی ہیں۔

ڈینٹل سروسز کی بات کی جائے تو جون کے مہینے میں ان کی قیمتوں میں 1.54 فیصد اضافہ ہوا جبکہ سالانہ بنیادوں پر ڈینٹل خدمات 26.66 فیصد تک مہنگی ہو گئی ہیں۔

سرکاری دستاویز میں بتایا گیا ہے کہ میڈیکل ٹیسٹ کی فیسوں میں بھی جون کے دوران 1.52 فیصد اضافہ ریکارڈ کیا گیا اور سالانہ لحاظ سے یہ فیسیں 6.99 فیصد مہنگی ہو چکی ہیں۔

اسپتالوں میں فراہم کی جانے والی سہولیات کی قیمت میں بھی جون کے مہینے میں 1.27 فیصد اضافہ دیکھا گیا جبکہ سالانہ بنیادوں پر اسپتال کی سہولیات 8.30 فیصد مہنگی ہو گئی ہیں۔

یہ اضافے صحت کی سہولیات تک کم آمدنی والے افراد کی رسائی کو محدود کر رہے ہیں اور علاج معالجے کے لیے مالی بوجھ بڑھا رہے ہیں، جس سے ملک میں صحت کے شعبے میں سہولیات کی فراہمی ایک بڑا چیلنج بنتی جا رہی ہے۔