لاہور: صوبائی دارالحکومت میں آج صبح سے شروع ہونے والی موسلا دھار بارش نے شہر میں ریکارڈ قائم کر دیا۔

 لاہور میں تقریباً آٹھ گھنٹے مسلسل جاری رہنے والی بارش کے دوران اوسطاً 136 ملی میٹر بارش ریکارڈ کی گئی جبکہ نشتر ٹاؤن میں سب سے زیادہ 178 ملی میٹر اور اقبال ٹاؤن و پانی والا تالاب کے علاقوں میں 175 ملی میٹر بارش ہوئی۔

بارش کے بعد شہر کے مختلف علاقوں میں پانی جمع ہونے کے باعث نکاسی آب کا چیلنج سامنے آیا، جس پر حکومت پنجاب، واسا اور دیگر متعلقہ ادارے فوری طور پر متحرک ہو گئے۔

وزیراعلیٰ پنجاب مریم نواز شریف خود نکاسی آب کے عمل کی مسلسل مانیٹرنگ کر رہی ہیں اور انہوں نے واسا، پی ڈی ایم اے، ٹریفک پولیس اور دیگر محکموں کو ہدایات جاری کی ہیں کہ ہنگامی بنیادوں پر اقدامات کیے جائیں۔

خصوصی طور پر علامہ اقبال ٹاؤن اور نشتر ٹاؤن میں پانی کی جلد نکاسی کے لیے خصوصی ٹیمیں روانہ کی گئیں، واسا کی ٹیمیں اور افسران فیلڈ میں موجود ہیں اور بجلی کی بار بار بندش کے باوجود نکاسی آب کے عمل میں رکاوٹیں دور کرنے کی بھرپور کوششیں جاری رکھے ہوئے ہیں۔

وزیراعلیٰ نے ٹریفک کی روانی کو یقینی بنانے کے لیے ٹریفک وارڈنز اور افسران کو بھی فیلڈ میں موجود رہنے کی ہدایت دی ہے تاکہ کسی بھی مرکزی شاہراہ پر ٹریفک بند نہ ہو۔

بعدازاں انتظامیہ، واسا، پی ڈی ایم اے اور دیگر ادارے مسلسل رابطے میں ہیں اور کسی بھی ہنگامی صورتحال سے نمٹنے کے لیے الرٹ ہیں۔