وزیرِاعظم محمد شہباز شریف نے پاکستان اور کرغزستان تعاون میں پیشرفت پر اطمینان کا اظہار کیا ہے۔

وزیرِاعظم محمد شہباز شریف سے آج اسلام آباد میں کابینہ کے ڈپٹی چیئرمین عادل بیسالوف کی قیادت میں کرغزستان کے ایک اعلیٰ سطحی وفد نے  ملاقات کی۔

 وفد پاکستان کرغزستان مشترکہ بین الحکومتی کمیشن (IGC) کے پانچویں اجلاس میں شرکت کے لیے پاکستان کا دورہ کر رہا ہے، جس کا مقصد متعدد شعبوں میں دوطرفہ تعاون کو مضبوط بنانا ہے۔

 وزیر اعظم شہباز شریف نے وفد کا خیر مقدم کیا اور آئی جی سی کے پانچویں اجلاس کے کامیاب انعقاد پر اطمینان کا اظہار کیا۔  انہوں نے پاکستان اور کرغزستان کے درمیان پروٹوکول اور مفاہمت کی متعدد یادداشتوں (ایم او یوز) پر دستخط کو سراہا اور انہیں تجارت، توانائی، تعاون، روابط اور عوامی تبادلوں کے فروغ کی جانب اہم قدم قرار دیا۔

 وزیر اعظم نے آئی جی سی اجلاس کے دوران کیے گئے فیصلوں پر عمل درآمد کے لیے پاکستان کے مضبوط عزم کا اعادہ کیا اور معاہدوں کو ٹھوس نتائج میں تبدیل کرنے کے لیے ان کی مؤثر و بروقت پیروری کی اہمیت پر زور دیا۔

یہ بھی پڑھیں: معیشت کی ڈیجیٹائزیشن سے شفافیت کے فروغ میں مدد ملے گی، وزیراعظم

اس موقع پر عادل بیسالوف نے دونوں ممالک کے مابین قریبی دوطرفہ تعلقات کو فروغ دینے کیلئے حکومت پاکستان کی کوششوں کو سراہا اور اس اعتماد کا اظہار کیا کہ  آئی جی سی کے نتائج گہرے اور مزید نتیجہ خیز تعاون کا باعث بنیں گے۔

 دونوں رہنماؤں نے پاکستان اور کرغزستان کی عوام کے باہمی فائدے کے لیے مل کر کام کرنے اور دونوں ممالک کے مابین مضبوط تعلقات کے لیے تعاون جاری رکھنے کے عزم کا اعادہ کیا۔