کراچی:کلفٹن بورڈ کنٹونمنٹ نے مخدوش عمارتوں کے سروے کا آغاز کردیا ہے جس کے مطابق پہلے مرحلے میں 125 خطرناک عمارتوں کی نشاندہی مکمل کرلی گئی ہے، اور اس حوالے سے اعلامیہ بھی جاری کردیا گیا ہے۔

سی بی سی کی جانب سے جاری کردہ اعلامیے کے مطابق دہلی کالونی میں 51، مدنی آباد میں 16، لوئر گزری میں 7 عمارتیں، جبکہ چوہدری خلیق الزماں کالونی میں 5، پنجاب کالونی میں 14، جمہوریہ کالونی میں 27، بخشن ولیج میں 5 عمارتیں مخدوش قرار دے دی گئی ہیں۔

مذکورہ عمارتیں شدید خستہ اور بوسیدہ حالت میں ہیں، مون سون کے دوران یہ عمارتیں انسانی جانوں اور املاک کے لیے شدید خطرہ بن سکتی ہیں، عوام کو متنبہ کیا جاتا ہے کہ خطرناک عمارتوں کے قریب نہ جائیں۔

یہ بھی پڑھیں: شہر قائد میں کتنی خطرناک عمارتیں ہیں؟ تفصیلات بول نیوز کو موصول

اعلامیے میں بتایا گیا  ہے کہ مخدوش عمارتوں کے حوالے سےمزید سروے کا عمل جاری ہے، آئندہ دنوں میں مزید علاقوں کی نشاندہی متوقع ہے۔

کلفٹن بورڈ کنٹونمنٹ نے مالکان اور کرایہ داروں کوعمارتیں فوری خالی یا منہدم کرنے کی ہدایت دیتے ہوئے کہا کہ غفلت کی صورت میں کنٹونمنٹ ایکٹ 1924 کے تحت قانونی کارروائی کی جائے گی۔

اعلامیے میں کہا گیا کہ خطرناک عمارت گرنے سے جانی یا مالی نقصان کا ذمہ دار بورڈ نہیں ہوگا، کسی بھی قسم کا دعویٰ یا ہرجانہ قبول نہیں کیا جائے گا، متاثرہ افراد اسٹرکچرل انجینئر سے معائنہ کرا کر فوری رپورٹ جمع کروائیں۔

اعلامیے کے مطابق معائنہ صرف پاکستان انجینئرنگ کونسل سے رجسٹرڈ انجینئر یافرم سے کروایا جائے، تاخیر نقصان کا باعث بن سکتی ہے، معاملہ انتہائی سنجیدہ نوعیت اختیار کر چکا ہے۔