اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے 25 جولائی تک ملک کے مختلف حصوں میں مون سون بارشوں کے باعث ممکنہ خطرات کی نشاندہی کرتے ہوئے متعلقہ اداروں اور عوام کو الرٹ رہنے کی ہدایت جاری کر دی ہے۔

شمالی علاقہ جات میں خطرات

گلگت بلتستان اور دیگر شمالی پہاڑی علاقوں میں شدید بارشوں کے باعث لینڈ سلائیڈنگ اور گلیشیئر جھیلوں کے پھٹنے (GLOF) کا خدشہ ظاہر کیا گیا ہے۔

خطرے سے دوچار علاقوں میں ریشون، بریپ، بونی، سردار گول، ٹھلو 1 و 2، ہنارچی، ہندور، درکوٹ، بدسوات، اشکومن اور ارکاری شامل ہیں۔

دریاؤں میں پانی کی سطح میں اضافہ

بارشوں کے نتیجے میں ملک کے بڑے دریاؤں میں پانی کی سطح بڑھنے کا امکان ہے:

دریائے سندھ: تربیلا، کالا باغ، چشمہ، تونسہ اور گڈو بیراج میں پانی کے بہاؤ میں اضافہ متوقع ہے۔

دریائے جہلم: منگلا کے بالائی علاقوں میں پانی کی سطح بڑھ سکتی ہے۔

دریائے چناب: مرالہ، خانکی اور قادرآباد کے مقامات پر نچلے سے درمیانے درجے کا سیلاب متوقع ہے۔

دریائے کابل: نوشہرہ کے مقام پر بھی پانی کے بہاؤ میں اضافہ کا امکان ہے۔

خیبرپختونخوا اور بلوچستان

خیبرپختونخوا میں دریائے سوات، پنجکوڑہ اور ملحقہ ندی نالوں میں طغیانی کا خدشہ ہے جبکہ گلگت بلتستان میں دریائے ہنزہ اور شگر میں سیلابی کیفیت پیدا ہو سکتی ہے۔

اس کے علاوہ ہسپر، خنجراب، شمشال، برالدو، ہوشے اور سالتورو جیسے علاقوں میں اچانک سیلاب کا خطرہ موجود ہے۔

بلوچستان کے اضلاع موسیٰ خیل، شیرانی، ژوب اور سبی کے مقامی ندی نالے بھی طغیانی کی زد میں آ سکتے ہیں۔

زمینی راستے متاثر

شدید بارشوں اور لینڈ سلائیڈنگ کے باعث شاہراہ قراقرم اور بابوسر ٹاپ دونوں اطراف سے بند ہو چکے ہیں۔

این ڈی ایم اے نے سیاحوں سے اپیل کی ہے کہ 25 جولائی تک پہاڑی علاقوں کے سفر سے اجتناب کریں۔

عوام کے لیے ہدایات

کسی بھی ہنگامی صورتحال میں ندی نالوں، پلوں یا پانی میں ڈوبی سڑکوں سے گزرنے سے گریز کریں۔

سڑکوں کی تازہ ترین صورتحال جاننے کے لیے ریڈیو یا مقامی انتظامیہ سے رجوع کریں۔

غیر تصدیق شدہ اور متبادل راستوں کے استعمال سے پرہیز کریں، یہ جان لیوا ہو سکتے ہیں۔

مقامی انتظامیہ فوری نکاسی آب کے لیے مشینری اور پمپس کو تیار رکھیں۔

این ڈی ایم اے کی اپیل

عوام کو مشورہ دیا گیا ہے کہ موسم کی صورتحال سے باخبر رہنے کے لیے پاک این ڈی ایم اے ڈیزاسٹر الرٹ ایپ استعمال کریں تاکہ بروقت حفاظتی اقدامات کیے جا سکیں۔