اسلام آباد: وزیراعظم پاکستان شہباز شریف نے ’’اڑان پاکستان‘‘ سمَر اسکالرز پروگرام سے پُرعزم خطاب کرتے ہوئے کہا کہ ملک دیوالیہ نہیں ہوگا، میں جانتا تھا۔

وزیراعظم پاکستان شہباز شریف نے ’’اڑان پاکستان‘‘ سمَر اسکالرز پروگرام کے تحت منتخب طلبہ سے خطاب کرتے ہوئے کہا ہے کہ پالیسی ریٹ کم ہوکر 11 فیصد ہوگیا ہے اور مستقبل میں اس میں مزید کمی کا امکان ہے تاکہ لوگ بینکوں میں رقوم رکھنے کے بجائے انہیں سرمایہ کاری میں استعمال کریں۔

وزیراعظم نے نوجوانوں کے لیے شروع کیے گئے اڑان پاکستان پروگرام کو ایک ’’شاندار اقدام‘‘ قرار دیتے ہوئے کہا کہ اس میں ملک کے بہترین تعلیمی اداروں سے آئے باصلاحیت نوجوان شامل ہیں جو مختلف وزارتوں اور اداروں میں کام سیکھیں گے اور حکومتی پالیسی سازی کو بہتر بنانے کے لیے اپنی آراء بھی دیں گے۔

ملک کو دیوالیہ ہونے سے بچایا، اب معیشت مثبت سمت میں گامزن ہے

اپنے خطاب میں وزیراعظم نے کہا کہ 2023 میں اکثریت کا خیال تھا کہ پاکستان دیوالیہ ہوجائے گا لیکن حکومت نے بروقت اور سنجیدہ فیصلوں کے ذریعے ملک کو ڈیفالٹ سے بچالیا۔

انہوں نے پراعتماد لہجے میں کہا مجھے یقین تھا کہ ہم ڈیفالٹ نہیں کریں گے، ہم نے مشکل حالات میں حکومت سنبھالی لیکن سنجیدہ ٹیم ورک اور مؤثر فیصلوں کی بدولت آج اقتصادی اشاریے بہتر ہورہے ہیں۔

انہوں نے اس بات پر زور دیا کہ ہم نے ذمہ داری اٹھائی، متحد ہوکر آگے بڑھنے کا عزم کیا اور خلوص نیت سے کام کیا جس کے مثبت نتائج سامنے آنا شروع ہوگئے ہیں۔

نوجوانوں سے امیدیں وابستہ، قومی ترقی میں کلیدی کردار ادا کریں گے

شہباز شریف نے اڑان پاکستان پروگرام میں شامل نوجوانوں کو ملک کے ’’سپراسٹارز‘‘ قرار دیتے ہوئے کہا کہ یہ نوجوان مختلف سرکاری اداروں، وزارتوں اور شعبوں میں کام سیکھیں گے۔ ان کے مشاہدات اور فیڈبیک سے حکومت فائدہ اٹھائے گی۔

انہوں نے کہا کہ اس پروگرام کے ذریعے طلبہ کو گورننس، پالیسی، منصوبہ بندی اور حکومتی امور کو قریب سے دیکھنے کا موقع ملے گا جو مستقبل میں ان کے لیے مفید ثابت ہوگا۔

یہ بھی پڑھیں: اڑان پاکستان کی کامیابی کی کنجی نوجوانوں کے ہاتھ میں ہے، احسن اقبال

وزیراعظم نے یہ بھی کہا کہ اس پروگرام میں ملک کے ہر کونے سے نوجوان شامل کیے گئے ہیں تاکہ قومی نمائندگی کا حقیقی عکس دکھایا جاسکے۔

پالیسی ریٹ میں کمی؛ سرمایہ کاری کے دروازے کھلیں گے

وزیراعظم نے معاشی پالیسی پر بات کرتے ہوئے کہا کہ پالیسی ریٹ میں حالیہ کمی سرمایہ کاری کے فروغ کے لیے اہم ہے۔ انہوں نے کہا کہ جیسے جیسے شرح سود کم ہوگی، لوگ پیسہ بینکوں سے نکال کر کاروبار اور صنعت میں لگائیں گے جس سے معیشت کا پہیہ تیزی سے چلے گا۔

نوجوانوں کا عزم، قوم کی امید

اڑان پاکستان اسکالرز سے خطاب کے دوران وزیراعظم نے نوجوانوں کے جذبے، علم اور جوش کو سراہتے ہوئے کہا کہ یہ ملک کی روشن امید ہیں۔ انہوں نے طلبہ پر زور دیا کہ وہ سنجیدگی سے سیکھیں، تجزیہ کریں اور مستقبل میں پاکستان کے لیے مؤثر اور محب وطن قیادت بنیں۔