فیلڈ مارشل سید عاصم منیر نےکہا کہ بدلتے علاقائی وعالمی حالات کے باوجود پاک چین دوستی ناقابل شکست رہی۔

پاک فوج کے شعبہ تعلقات عامہ(آئی ایس پی آر) کے مطابق جی ایچ کیو راولپنڈی میں پیپلزلبریشن آرمی چین کی 98 ویں سالگرہ کی تقریب کا انعقاد کیا گیا۔

چینی سفیر جیانگ زائیڈونگ تقریب کے مہمانِ خصوصی تھے۔

تقریب میں میجر جنرل وانگ ژونگ، چینی سفارتخانے کے حکام کے علاوہ پاک افواج کے سینئر افسران شریک تھے۔

آرمی چیف فیلڈ مارشل سید عاصم منیر نے چینی مہمانوں کے لیے پُرتپاک خیرمقدم کرتے ہوئے پیپلز لبریشن آرمی کو 98 ویں یومِ تاسیس پر مبارکباد پیش کی۔

فیلڈ مارشل سیدعاصم منیر نے پی ایل اےکےدفاع، سیکیورٹی، قومی ترقی میں کردار کو سراہتے ہوئے کہاکہ پاک چین تعلقات وقت کی آزمائشوں پرپورا اترنے والے، منفرد، مضبوط ہیں۔

یہ بھی پڑھیں: پاکستان اور چین کے دو طرفہ تعلقات مثالی ہیں، آرمی چیف جنرل عاصم منیر

انہوں نے کہا کہ پاکستان، چین کا تزویراتی اشتراک باہمی اعتماد، غیر متزلزل حمایت، مشترکہ عزم کی علامت ہے، بدلتے علاقائی وعالمی حالات کے باوجود پاک چین دوستی ناقابل شکست رہی۔

فیلڈ مارشل کا کہنا تھا کہ پاکستان آرمی اور پی ایل اے حقیقی معنوں میں بھائیوں کی طرح ہیں، پاک چین عسکری شراکت داری علاقائی استحکام کےفروغ میں کلیدی کردار ادا کرتی رہے گی۔

دوسری جانب چینی سفیر نے یومِ تاسیس کی تقریب کے انعقاد پر آرمی چیف کا شکریہ ادا کرتے ہوئے کہا کہ دہشت گردی کے خلاف جنگ میں پاک افواج کے کردار کو خراجِ تحسین پیش کرتے ہیں، چین پاکستان کیساتھ اپنی اسٹریٹجک شراکت داری کو مزید مضبوط بنانے کا خواہاں ہے۔