اسلام آباد: پاکستان نے بھارتی وزارت خارجہ کا غیرسنجیدہ اور غیرذمہ دارانہ بیان سختی سے مسترد کرتے ہوئے کہا کہ ایٹمی بلیک میلنگ کا بھارتی بیانیہ گمراہ کن اور خودساختہ ہے۔

ترجمان دفترخارجہ نے اپنے جاری کردہ بیان میں کہا کہ بھارتی وزارت خارجہ کے غیرسنجیدہ ریمارکس مسترد کرتے ہیں، بھارتی وزارت خارجہ کا حقائق مسخ کرنے کارویہ پرانا ہے۔

انہوں نے کہا کہ پاکستان طاقت کے استعمال یا اس کی دھمکی کی مخالفت کرتا ہے، بھارت ہرموقع پر جنگی جنون اور بےبنیاد الزامات کا سہارا لیتا ہے۔

ترجمان دفترخارجہ نے کہا کہ پاکستان ذمہ دار ایٹمی ریاست ہے، مکمل سول کنٹرول میں کمانڈ اینڈ کنٹرول سسٹم رکھتا ہے، پاکستان نے ہمیشہ تحمل اورنظم وضبط کا مظاہرہ کیا، پاکستان کی انسداد دہشت گردی کی کاوشیں دنیا بھر میں تسلیم شدہ ہیں۔

پاکستان کی جانب سے کہا گیا ہے کہ پاکستانی سیکیورٹی فورسز دہشت گردی کے خلاف مضبوط دیوار ہیں، بھارتی الزامات غیرذمہ دارانہ اوربے بنیاد ہیں، بھارت کی جانب سے دیگر ملکوں کو شامل کرنے کی کوشش بلاجواز اور بےمقصد ہے۔

ترجمان نے مزید کہا کہ تیسرے ممالک کو بلاوجہ شامل کرنے کی بھارتی کوشش ناکام ہے، بھارت کا یہ رویہ اس کی سفارتی کمزوری ظاہر کرتا ہے، پاکستان ذمہ دار ریاست کے طور پر کردار ادا کرتا رہے گا، پاکستان کی خودمختاری یا علاقائی سالمت کی خلاف ورزی کامنہ توڑ جواب دیا جائے گا، کسی بھی کشیدگی کی ذمہ داری بھارتی قیادت پر ہوگی۔