گوجرانوالہ: ہیڈ قادرآباد کے قریب پانی کا دباؤ کم کرنے کے لیے حفاظتی بند کو دھماکے سے اڑا کر شگاف ڈال دیا گیا جس کی ویڈیو بول نیوز نے حاصل کرلی۔

دریائے چناب میں پانی کے بہاؤ میں مسلسل اضافے کے باعث ضلعی انتظامیہ نے ہنگامی قدم اٹھاتے ہوئے ہیڈ قادرآباد کے قریب حفاظتی شگاف ڈال دیا۔ اس مقصد کے لیے ایک چھوٹا دھماکا کیا گیا تاکہ ممکنہ نقصان کو کم کیا جاسکے۔

انتظامیہ کے مطابق دریائے چناب پر جھنگ کے تریموں ہیڈ ورکس پر بھی پانی کی سطح تیزی سے بلند ہو رہی ہے، جہاں پانی کی آمد 63 ہزار 34 کیوسک جب کہ اخراج 51 ہزار 834 کیوسک ریکارڈ کیا گیا ہے۔

ضلعی حکام کا کہنا ہے کہ اگر پانی کے بہاؤ میں اضافہ برقرار رہا تو ضلع بھر کے کم از کم 412 دیہات متاثر ہوسکتے ہیں۔ اسی خدشے کے پیشِ نظر نشیبی اور دریائی علاقوں کے رہائشیوں کو فوری طور پر مویشیوں سمیت محفوظ مقامات پر منتقل ہونے کی ہدایت کردی گئیں ہے۔

اس ضمن میں مساجد کے ذریعے اعلانات بھی جاری ہیں تاکہ زیادہ سے زیادہ لوگوں کو بروقت آگاہ کیا جاسکے اور جانی نقصان سے بچا جاسکے۔

بھارت کی جانب سے دریاؤں میں پانی چھوڑے جانے اور پنجاب میں شدید بارشوں کے بعد دریائے چناب میں سیلابی صورت حال کا سامنا ہے۔

ڈی جی پی ڈی ایم اے کے مطابق دریائے راوی میں 1988 کے بعد اتنی بڑی مقدار میں پانی آیا ہے جب کہ آئندہ دو سے تین دن میں دریائے راوی سے بڑا سیلابی ریلہ گزرے گا۔