چیف آف آرمی اسٹاف فیلڈ مارشل سید عاصم منیر نے کہا کہ ترقی خوشحالی اور پائیدار ترقی کے لیے پاک فوج بلوچستان کے عوام کے ساتھ ہے۔

پاک فوج کے شعبہ تعلقات عامہ ( آئی ایس پی آر) کے مطابق چیف آف آرمی اسٹاف فیلڈ مارشل سید عاصم منیر نے تربت کا دورہ کیا، تربت آمد پر کور کمانڈر بلوچستان نے  فیلڈ مارشل سید عاصم منیر کا استقبال کیا۔

اس موقع پر فیلڈ مارشل کے ساتھ وزیراعلیٰ بلوچستان، چیف سیکریٹری اور دیگر اعلیٰ حکام موجود تھے۔

آئی ایس پی آر نے بتایا کہ کے تربت دورے کے دوارن فیلڈ مارشل سید عاصم منیر کو ترقیاتی منصوبوں، سول اور ملٹری اداروں کے درمیان مربوط روابط کے حوالے سے آگاہ کرنے کے ساتھ  سیکیورٹی صورتحال کے حوالے سے جامع بریفنگ دی گئی۔

دورے کے دوران آرمی چیف کو ترقیاتی منصوبوں اور جنوبی بلوچستان میں سماجی و معاشی صورتحال میں بہتری کے لیے اقدامات کے ساتھ فتنہ الہندوستان کے خلاف جاری کامیاب آپریشنز سے بھی آگاہ کیا گیا۔

یہ بھی پڑھیں: واشنگٹن ٹائمز نے فیلڈ مارشل عاصم منیر کو جنوبی ایشیا میں بااثر شخصیت و مردِ آہن قرار دے دیا

 فیلڈ مارشل سید عاصم منیر نے دورے کے دوران فوجی دستوں سے خطاب کرتے ہوئے جوانوں کے بلند حوصلے، آپریشنل تیاریوں، غیر متزلزل عزم کے ساتھ کٹھن حالات میں خطے میں امن اور استحکام کے لیے فوجی دستوں کے کردار کو سراہا۔

وزیراعلیٰ بلوچستان اور سول انتظامیہ کے نمائندوں کے ساتھ ملاقات میں آرمی چیف نے گڈ گورننس اور  انفراسٹرکچر ڈویلپمنٹ کی اہمیت اجاگر کرتے ہوئے بلوچستان کے عوام کو درپیش چیلنجز سے نمٹنے کے لیے سول ملٹری مشترکہ کوششوں پر زور دیا۔

 آرمی چیف نے جنوبی بلوچستان کی سماجی و معاشی ترقی کے لیے بھرپور اور  غیر متزلزل حمایت کا اعادہ کرتے ہوئے کہا کہ پاک فوج بلوچستان کے عوام کے شانہ بشانہ کھڑی ہے۔