5 اگست 2019 کو بھارت کی جانب سے مقبوضہ جموں و کشمیر کی خصوصی آئینی حیثیت ختم کرنے کے غیر قانونی اقدام کو چھ سال مکمل ہونے پر ملک بھر میں یومِ استحصالِ کشمیر عقیدت و عزم کے ساتھ منایا جارہا ہے۔

اس موقع پر ملک کی اعلیٰ قیادت نے کشمیری عوام سے یکجہتی کے اظہار کے لیے ویڈیو پیغامات جاری کیے اور عالمی برادری سے فوری اقدامات کا مطالبہ کیا۔

وفاقی وزیر اطلاعات عطا اللہ تارڑ نے اپنے ویڈیو پیغام میں 5 اگست کو کشمیر کی تاریخ کا “سیاہ ترین دن” قرار دیا اور کہا کہ بھارت نے اس روز مقبوضہ جموں و کشمیر کی آئینی حیثیت ختم کرکے کشمیری عوام سے ان کے بنیادی حقوق چھین لیے۔

انہوں نے کہا کہ پاکستان کا ہر شہری اپنے کشمیری بہن بھائیوں کے ساتھ سیسہ پلائی دیوار کی طرح کھڑا ہے۔ ہم کشمیری عوام کے حقِ خودارادیت کی حمایت کرتے رہیں گے۔

عطا تارڑ نے بھارتی ریاستی ظلم، انسانی حقوق کی پامالیوں، اور آبادی کے تناسب کو تبدیل کرنے کے اقدامات کی سخت مذمت کرتے ہوئے کہا کہ بھارتی حکومت عالمی سطح پر بے نقاب ہو چکی ہے۔

وفاقی وزیر داخلہ محسن نقوی نے اپنے بیان میں کہا کہ 5 اگست 2019 کو بھارت نے اقوام متحدہ کی قراردادوں اور بین الاقوامی قوانین کی کھلی خلاف ورزی کرتے ہوئے کشمیریوں کے آئینی، جمہوری اور انسانی حقوق پر ڈاکا ڈالا۔

انہوں نے کہا کہ مودی سرکار نے ظلم و تشدد، ماورائے عدالت قتل، میڈیا بلیک آؤٹ، اور مسلسل کرفیو کے ذریعے وادی کو انسانی حقوق کا قبرستان بنا دیا ہے۔

وزیر داخلہ نے مزید کہا کہ بی جے پی حکومت کی جانب سے لائے گئے ڈومیسائل قوانین کے تحت لاکھوں غیر مقامی ہندو باشندوں کو وادی میں بسا کر مقامی آبادی کو اقلیت میں تبدیل کرنے کی مذموم کوشش کی جا رہی ہے۔

نائب وزیراعظم و وزیر خارجہ سینیٹر اسحاق ڈار نے بھی یومِ استحصال کے موقع پر اپنے بیان میں کہا کہ بھارت گزشتہ 78 برسوں سے کشمیری عوام کو حقِ خودارادیت سے محروم رکھا ہوا ہے۔ 5 اگست 2019 کے بعد ظلم، آبادیاتی تبدیلی، ذرائع ابلاغ پر پابندیاں اور سیاسی کارکنوں کی گرفتاریاں معمول بن چکی ہیں۔

انہوں نے کہا کہ ہم مطالبہ کرتے ہیں کہ کشمیری عوام کو اقوام متحدہ کی قراردادوں کے مطابق ان کا حق دیا جائے، اور انسانی حقوق کی پامالیوں کا خاتمہ ہو۔ پاکستان ان کی حمایت ہر سطح پر جاری رکھے گا۔

وفاقی وزیر منصوبہ بندی پروفیسر احسن اقبال نے کہا کہ بھارت نے 5 اگست 2019 کو جموں و کشمیر کی حیثیت کو غاصبانہ طور پر بدلنے کی کوشش کی، مگر کشمیری عوام کی جدوجہد کو دبایا نہیں جا سکتا۔

انکا کہنا تھا کہ یہ وہ حق ہے جو اقوام متحدہ نے کشمیریوں کو دیا ہے۔ بھارتی مظالم کے باوجود کشمیری عوام کی تحریک آزادی کو نئی توانائی مل رہی ہے۔

وفاقی وزیر برائے امور کشمیر انجینیئر امیر مقام نے کہا کہ پوری پاکستانی قوم کا مسئلہ کشمیر پر ایک مؤقف ہے، پاکستان بھارت کے یکطرفہ اقدامات کو مسترد کرتا ہے اور کشمیریوں کی جرات کو سلام پیش کرتا ہے، ہم ان کے شانہ بشانہ کھڑے ہیں، جب تک انہیں ان کا حق نہیں مل جاتا۔

یومِ استحصالِ کشمیر پر گورنر سندھ کامران خان ٹیسوری نے کراچی میں جاری اپنے پیغام میں کہا کہ5 اگست 2019 کا دن کشمیری عوام پر ظلم و ستم کی نئی داستان ہے۔ بھارت نے یکطرفہ اقدامات سے کشمیریوں کے حقوق پامال کیے لیکن ہم ہر عالمی فورم پر کشمیریوں کی آواز بنیں گے۔

انہوں نے اس عزم کا اعادہ کیا کہ پاکستان کشمیریوں کی سیاسی، اخلاقی اور سفارتی حمایت ہمیشہ جاری رکھے گا۔