دوحہ: قطر میں عرب اسلامی سربراہی اجلاس کے موقع پر وزیراعظم پاکستان شہباز شریف نے سعودی ولی عہد شہزادہ محمد بن سلمان سے اہم ملاقات کی جس دوران فیلڈ مارشل عاصم منیر اور نائب وزیراعظم اسحاق ڈار بھی موجود تھے۔

دونوں رہنماؤں کے درمیان دوحہ پر اسرائیلی جارحیت کے بعد کی تازہ صورتحال اور مشرق وسطیٰ میں امن و استحکام کے امکانات پر تفصیلی تبادلہ خیال کیا گیا۔

وزیراعظم شہباز شریف نے اسرائیلی جارحیت کی شدید مذمت کرتے ہوئے کہا کہ یہ اقدام دانستہ طور پر خطے میں امن قائم کرنے کی کوششوں کو ڈی ریل کرنے کے مترادف ہے۔

 انہوں نے اس موقع پر سعودی ولی عہد کے قائدانہ کردار کو خراجِ تحسین پیش کرتے ہوئے کہا کہ مشکل گھڑی میں امت مسلمہ کو اکٹھا کرنے میں سعودی عرب کا کردار لائقِ ستائش ہے۔

وزیراعظم کا کہنا تھا کہ اسرائیلی جارحیت خطے کے امن و استحکام کے لیے شدید خطرہ ہے۔ انہوں نے یقین دلایا کہ پاکستان اقوام متحدہ، او آئی سی سمیت ہر سفارتی فورم پر مظلوم فلسطینی عوام کے ساتھ کھڑا ہے۔

انہوں نے مزید کہا کہ دوحہ سمٹ دنیا کو واضح پیغام دیتا ہے کہ مسلمان اسرائیلی جارحیت کے خلاف متحد اور یک زبان ہیں جب کہ وزیراعظم نے ہر مشکل وقت میں پاکستان کی غیر متزلزل حمایت پر سعودی ولی عہد اور سعودی حکومت کا شکریہ بھی ادا کیا۔

اس موقع پر سعودی ولی عہد شہزادہ محمد بن سلمان نے کہا کہ وہ وزیراعظم پاکستان کے آئندہ سرکاری دورہ سعودی عرب کے منتظر ہیں۔ یہ دورہ نہ صرف دوطرفہ تعلقات بلکہ علاقائی و عالمی امور پر بھی جامع تبادلہ خیال کا موقع فراہم کرے گا۔

وزیراعظم شہباز شریف نے خادم حرمین شریفین شاہ سلمان بن عبدالعزیز کے لیے نیک خواہشات اور دلی احترام کا اظہار بھی کیا۔

اس موقع پر سعودی ولی عہد نے پاکستان کی فعال سفارتی کاوشوں کو سراہا اور بالخصوص اقوام متحدہ کی سلامتی کونسل اور او آئی سی میں پاکستان کے کردار کو قابلِ تعریف قرار دیا۔